АҚШ Давлат департаментининг расмий вакили Нед Прайс Россиянинг тўртта онлайн платформаси АҚШ томонидан тасдиқланган вакциналар ҳақида нотўғри маълумот тарқатганини маълум қилди. Унинг сўзларига кўра, улар буни Россия разведка хизмати бошчилигида амалга оширган. Бу ҳақда «Коммерсантъ» хабар берди.
«Махфий хизматлар назорати остида ишлайдиган ва вакциналар ҳақида нотўғри маълумот тарқатган Россиянинг тўртта онлайн платформаси аниқланди... Шубҳасиз, Россия ўзининг эски ҳийла-найрангларини қилиб, ҳаётни сақлаб қолиш воситаси бўлган вакциналар ҳақида нотўғри маълумот тарқатиши одамларни хавф остига қўйиши мумкин», — деди Прайс.
Аввалроқ Оқ уй Россия томонининг вакциналар тўғрисида нотўғри маълумот тарқатиш бўйича тактикаси ҳақида билишини айтган эди. Унинг сўзларига кўра, Вашингтон дезинформацияга қарши туради. Шунингдек, Европа дипломатияси раҳбари Жозеп Боррель кремлпараст оммавий ахборот воситалари коронавирус билан боғлиқ ёлғон маълумотлар тарқатаётганини айтди.
Россия президентининг матбуот котиби Дмитрий Песков «вакциналар масаласида қандай танқид бўлмасин», унда Россия махсус хизматлари иштирок этмаганини айтди.
Аввалроқ The New York Times АҚШ Россияга қарши бир қатор киберҳужумлар тайёрлаётгани ҳақида хабар берганди.
Изоҳ (0)