АҚШ президенти Жо Байден Россия давлат раҳбари Владимир Путин билан телефон орқали мулоқот қилди. Бу ҳақда Оқ уй маълум қилган, деб ёзмоқда «Интерфакс».
Президентлар стратегик барқарорлик, глобал ва минтақавий мавзуларни муҳокама қилган.
«Улар кўплаб минтақавий ва глобал муаммолар, жумладан, АҚШ ҳамда Россиянинг стратегик барқарорликни давом эттириш шартларини муҳокама қилди», — дейилади Оқ уй баёнотида.
Оқ уй мулоқотнинг қуролланиш назорати масалалари, шунингдек, хавфсизлик соҳасидаги муаммоларга тааллуқли эканини билдирган.
Икки президентнинг телефондаги суҳбати Байден ABC News журналистининг «Путинни қотил деб ҳисоблаш мумкинми?» қабилида берган саволига «Ҳа» деб жавоб берганидан кейин биринчи мулоқот бўлди. Ўшанда АҚШ давлат раҳбарининг мазкур ҳаракатига Кремль ва Россия Давлат думаси томонидан кескин жавоб қайтарилган.
Учинчи томонда саммит ўтказиш таклифи
АҚШ президенти россиялик ҳамкасбига яқин ойлар ичида учинчи бир мамлакатда саммит ўтказишни таклиф қилди.
«Президент Байден Россия билан барқарор ва АҚШ манфаатларига ҳар томонлама мос келадиган муносабатлар ўрнатиш истагини билдирди. У яқин ойлар ичида учинчи бир мамлакатда АҚШ ҳамда Россия дуч келаётган масалаларни муҳокама қилиб олишни таклиф этди», — дейилади Оқ уй ахборотида.
Украина мавзуси
Байден телефондаги сўзлашув вақтида Украина билан чегара ҳудудларда Россия Қуролли Кучларининг жойлаштирилганидан хавотирда эканини қайд этган ва Москвадан Киев билан кескин муносабатларни камайтиришни сўраган.
«Президент АҚШ Россиянинг Қрим ва Украина чегарасида қўшинлари сонини ошираётганидан хавотирда эканини айтди ва Путиндан мазкур ҳудудлардаги кескинликни камайтиришни сўради», — дейилган баёнотда.
«Президент Байден АҚШ Украинанинг суверенитети ва ҳудудий яхлитлигини ишонч билан қўллаб-қувватлаши ҳақида гапирган», — дейилади ҳужжатда.
Хакерлар ва сайловларга аралашув
Шунингдек, телефондаги суҳбатда Россиянинг АҚШдаги сайловларга аралашуви ҳамда хакерлик ҳужумлари ҳам муҳокама қилинган.
«Президент Байден АҚШнинг миллий манфаатларини ҳимоя қилиш йўлида Россияга киберҳужумлар ва сайловларга аралашув учун жавоб қайтаришга тайёр эканини маълум қилди», — дейилган баёнот сўнгида.
Аввал АҚШнинг гарчи Россия элчисини чақириб олганига қарамай, Москвадаги элчисини ўзгартирмасликка қарор қилгани ҳақида хабар берилганди.
Изоҳ (0)