Япония ҳукумати уч йиллик киберхавфсизлик стратегияси лойиҳасини маъқуллади, унда биринчи марта Россия, Хитой ва Шимолий Корея хакерлик ҳужумларининг потенциал манбалари деб аталди.
Ҳужжатда айтилишича, бу уч мамлакат душманларча уюштирилган киберҳужумларга алоқадорликда гумон қилинмоқда. Шунингдек, Япония «барча самарали воситалар ва имкониятлардан фойдаланган ҳолда қаттиқ чоралар кўради». Булар жумладан, кибертаҳдидларга жавобан дипломатик чоралар ва жиноий таъқибларни ўз ичига олади.
Япониялик мутахассисларнинг фикрича, кибермакондаги таҳдидлар сўнгги пайтларда фақат ортиб бормоқда.
Япония, шунингдек, QUAD альянси доирасида ўз шериклари — АҚШ, Австралия ва Ҳиндистон билан, шунингдек, Ҳинд-Тинч океанининг эркин ва очиқ реализацияси учун Жануби-Шарқий Осиё давлатлари ассоциацияси билан киберхавфсизлик соҳасидаги ҳамкорликни кучайтирмоқчи.
Иқтисодий фаолият билан боғлиқ хавфларни бартараф этиш нуқтаи назаридан, стратегияда сувости кабеллари каби муҳим инфратузилмани ишончли ҳимоя қилишни таъминлаш ва АТ-қурилмалари учун янги хавфсизлик ва ишончлилик стандартларини яратиш зарурлиги қайд этилган.
Аввалроқ QUAD мамлакатлари раҳбарлари киберхавфсизлик соҳасида ҳамкорлик қилишга келишиб олганди. «Бугун биз кибермаконда янги ҳамкорликни бошлаймиз ва кибертаҳдидларга қарши курашиш, барқарорликни ошириш ва муҳим инфратузилмамизни ҳимоя қилиш учун биргаликда ишлаш мажбуриятини оламиз», — дейилади Оқ уй матбуот хизмати хабарида.
Апрель ойида АҚШ разведкаси Россияни кибермайдондаги энг асосий таҳдид деб атаганди. Аввал Россия Ғарб давлатларининг киберҳужумлар ҳақидаги баёнот ва эътирозларини кескин рад этган.
Изоҳ (0)