Нидерландиялик киберхавфсизлик бўйича мутахассис, GDI Foundation нотижорат ташкилоти ҳамасосчиси Виктор Геверс АҚШ президенти Дональд Трампнинг паролини тахмин қилиб топиб, унинг Twitter’ига кира олганини маълум қилди, деб ёзади Meduza. Парол magа2020! — Трампнинг сайловолди шиори — Make America great again иборасининг қисқартмаси бўлиб чиқди.
Геверс Нидерландиянинг de Volkskrant газетасига берган интервьюсида паролни 16 октябрь куни беш марта уринишда топганини айтди. «Тўрт марта муваффақиятсиз уринишдан кейин мени блоклаб қўйишларини, ҳеч бўлмаганда, мендан қўшимча маълумот сўрашларини кутгандим», — дейди эксперт. Унинг сўзларига кўра, Трампнинг аккаунти икки факторли аутентификация билан ҳимояланмаган, бу эса унга аккаунтга кириш имкониятини берган.
Виктор Геверс Америка президенти Twitter’ига ҳеч нарса ёзиб ўтирмади, аммо аккаунтга кира олганини исботлаш учун скриншотлар олди. Одобли хакер сифатида Геверс АҚШ президентига хат ёзиб, узунроқ парол ўйлаб топишни ва икки факторли аутентификацияни ёқиб қўйишни таклиф қилди. Шунингдек, АҚШнинг киберхавфсизлик бўйича агентлиги, МРБ, ФҚБ, Оқ уй, Трампнинг сайловолди штабига ва Twitter маъмуриятига мурожаат қилди.
Эртаси куни Геверс Трампнинг аккаунтида икки факторли аутентификация ёқилганини сезди. Яна икки кундан кейин у билан АҚШ Махфий хизмати боғланди, унга Геверс ўзида бор маълумотни юборди. Шундан кейин Трампнинг Twitter’идаги парол ўзгартирилди.
Twitter компанияси Виктор Геверс ҳақиқатан ҳам Америка президенти аккаунтига кирганини тасдиқловчи ҳеч қандай далил топмаганини маълум қилди. Оқ уйда эса Геверснинг гапларини — «мутлақо ёлғон» деб аташди.
Виктор Геверс 2016 йилда ҳам яна икки хакер билан бирга Трампнинг аккаунтига кирган, бунда 2012 йилда Линкедин хакерлар ҳужумига учраганидан кейин Трампнинг тарқалиб кетган паролидан фойдаланишган эди. Бу Трампнинг The Apprentice («Шогирд») реалити-шоусидаги машҳур иборасига ишора қилувчи yourefried («Ишдан бўшатилдингиз») пароли эди.
Виктор Геверс компьютер хавфсизлиги билан боғлиқ жиддий ҳолатлар ҳақида кўп марта маълум қилган. Масалан, 2018 йилда у интернетда Хитой полицияси пудратчисининг маълумотлар базасини топган, у миллионлаб уйғурлар кузатилгани ҳақидаги маълумотлардан иборат эди.
Аввалроқ Россия хакерлари АҚШдаги федерал ва маҳаллий компьютер тармоқларига кириш имкониятига эга бўлиб, энди Трампга ёрдам бериш учун АҚШдаги сайловларга аралашмоқчи эканлиги маълум қилинганди.
Изоҳ (0)