Япониянинг Japan Airlines авиакомпанияси (JAL) кенг кўламли киберҳужумга учради, бу эса мамлакат ичида ҳам, ундан ташқарида ҳам рейсларнинг бекор қилиниши ва кечиктирилишига олиб келди.
Компания хакерлар қурбони бўлганини тасдиқлади ва ички ҳамда ташқи тизимларда узилишлар ҳақида хабар берди.
“Биз ҳужумга учраган парвозлар ҳақида батафсил маълумот бера олмаймиз”, деди авиакомпания вакили.
Техник муаммолар туфайли, шунингдек, авиачипталар сотуви тўлиқ тўхтатилди. Ҳужум ортида ким турганлиги ва унинг сабаблари ҳозирча номаълум. Шу билан бирга, Япониянинг иккинчи йирик авиакомпанияси All Nippon Airways (АNА) ўз тизимлари хакерлик ҳужумларига учрамаганини маълум қилди.
Японияда киберҳужумлар тобора кўпаймоқда. 2023 йилда Япониянинг JAXА космик агентлиги ва фирибгар дастурлар ёрдамида амалга оширилган ҳужум натижасида ишдан чиққан Нагоя порти хакерлар қурбонига айланди. 2022 йилда эса Toyota компаниясининг таъминотчиси тизимларига қилинган ҳужум автомобиль концернини Японияда ишлаб чиқаришни бир кунга тўхтатишга мажбур қилган эди.
Бундай ҳодисалар Япониядан ташқарида ҳам содир бўлмоқда. Рождествода техник носозликлар American Airlines ишини тўхтатиб қўйди, бу эса рейсларнинг кечикиши ва бекор қилинишига олиб келди. Бу муаммолар хакерлар ҳаракати билан боғлиқми ёки йўқми, ҳозирча номаълум.
Изоҳ (0)