Эрон мамлакатда давом этаётган норозилик намойишларини бостиришда Россияга ёрдам сўраб мурожаат қилди. Бу ҳақда Iran International хабар берди.
Нашр маълумотига кўра, мазкур ёрдам намойишчилар билан курашиш учун асбоб-ускуналар билан таъминлаш ва хавфсизлик ходимларини ўқитишни ўз ичига олади. Бу маълумот Оқ уйнинг Россия Теҳронга норозиликларни бостиришнинг энг яхши амалиётлари бўйича маслаҳат бериши мумкинлиги ҳақидаги октябрда эълон қилган баёнотини тасдиқламоқда.
«Теҳрон Москвага Украинага қарши уруш олиб боришда ёрдам бераётганига оид далиллар очиқ ва оммага маълум. Эрон ва Россия яккаланиб қолгани сайин яқинлашмоқда. Бизнинг Эронга мурожаатимиз жуда аниқ: халқингизни ўлдиришни тўхтатинг ва украиналикларни ўлдириш учун Россияга қурол юборишни бас қилинг», — дейилганди Оқ уй баёнотида.
Хакерлар томонидан қўлга киритилган ва Iran International’га етказилган махфий файллар ҳам Теҳрон ўзининг ички ҳолатини баҳолаш учун Москва бераётган маълумотларга таянаётганини кўрсатади. Ҳужжатда Россия Теҳронга норозилик ҳаракатининг табиати ва кучи ҳақида баҳо бериш учун Ғарбдаги алоқаларига таяниши ҳақида маълумот бор.
Ҳафта бошида «Black Reward» хакерлик гуруҳи томонидан қўлга киритилган аудиофайлда Эрон расмийларининг эскирган хавфсизлик кучлари, оммавий ахборот воситаларидаги носозликлар ва ишчиларнинг иш ташлашлари ҳақидаги хавотирлари аниқланган.
Эронда 17 сентябрдан бери давом этаётган намойишларда 18 000 га яқин одам ҳибсга олинди. Ҳозиргача олти киши ўлимга ҳукм қилингани маълум. 469 нафар намойишчи ва 61 нафар хавфсизлик кучлари аъзоси эса ўлдирилган.
Мавзуга доир:
Изоҳ (0)