Америка компанияси Аir Company атмосферадаги карбонат ангидридни суюқ ёқилғи — синтетик бензинга айлантирадиган инқилобий Аirmade қурилмасини тақдим этди. Музлаткич ҳажмидаги қурилма фақат ҳаво, сув ва қайта тикланувчи электр энергиясидан фойдаланиб, кунига бир литргача ёқилғи ишлаб чиқариши мумкин. Бу ҳақда Interesting Engineering нашри хабар бермоқда.
Таъкидланишича, ҳозирда авиация ва денгиз транспорти деярли тўлиқ қазиб олинадиган ёқилғига боғлиқ. Водород ёки аккумуляторлар каби муқобил энергия манбалари ҳозирча иккинчи даражали аҳамиятга эга. Аirmade углерод нейтрал ечимни таклиф қилади: бундай ёқилғи ёнганда ҳаводан қанча углерод диоксиди олинган бўлса, шунча миқдорда ажралиб чиқади.
Технология карбонат ангидридни электрокимёвий қайтариш жараёнига асосланган. Қурилма ҳаводаги карбонат ангидридни ютиб, уни водород (сувдан электролиз йўли билан олинган) билан аралаштиради ва катализатор ёрдамида углеводородларга айлантиради. Ҳосил бўлган ёнилғи кимёвий жиҳатдан оддий бензиндан фарқ қилмайди ва мавжуд двигателларда ўзгартиришларсиз ишлатилиши мумкин.
Тизим турар жой, тижорат ва саноат биноларида минимал олдиндан созлаш билан автоматик уланиш ва ишлашга мўлжалланган.
Маълум қилинишича, ҳозирча музлатгич ўлчамидаги қурилма фақат кичик ҳажмда ишлаб чиқарилмоқда, аммо компания технологияни кенгайтиришни режалаштирмоқда. Асосий муаммолар — электролиз учун энергия сарфи туфайли юқори нарх ва паст самарадорлик. Бироқ қуёш ёки шамол электр станцияларининг ортиқча энергиясидан фойдаланилса, жараён иқтисодий жиҳатдан фойдали бўлиши мумкин.
Аir Company аллақачон АҚШ ҳарбий-ҳаво кучлари ва авиация саноати билан ҳамкорлик қилмоқда. Келажакда бундай қурилмалар чекка ҳудудларни ёқилғи билан таъминлаши ёки қайта тикланадиган энергияни суюқ ҳолда сақлаш учун ишлатилиши мумкин. Агар технология ривожланса, бу транспортни карбонсизлантириш йўлидаги муҳим қадам бўлади.
Қўшимча қилинишича, АҚШлик тадқиқотчилар жамоаси сунъий фотосинтез соҳасида катта ютуққа эришди. Олимлар фақат қуёш нури энергияси ҳисобига карбонат ангидридни суюқ ёқилғига ва бошқа қимматли кимёвий моддаларга айлантирадиган қурилма ишлаб чиқдилар.
Изоҳ (0)