Туркманистон бензин нархи энг арзон 10 та давлат қаторига кирди

Туркманистон Аи-95 бензини нархи энг паст бўлган ўнта давлат қаторига кирди. Қўшни республика бу борада Марказий Осиёда ҳам етакчилик қилмоқда.

Global Petrol Prices портали маълумотларига кўра, Туркманистонда бензин бир литри нархи 0,0429 АҚШ доллари туради. Дунё бўйлаб энг арзон бензин нархи 0,029 доллар бўлиб, Эронда қайд этилган. Бундан ташқари, паст нархлар Ливия (0,032 доллар), Венесуэла (0,035 доллар), Миср (0,309 доллар), Жазоир, Кувайт (0,344 доллардан), Малайзия (0,471 доллар) ва Нигерияда (0,485 доллар) ҳам кузатилган.

Ўз навбатида, бензиннинг энг юқори нархлари Исроил, Барбадос, Сингапур, Дания, Швейцария, Нидерландия, Лихтенштейн, Исландия, Монако ва Гонконг каби давлатларда қайд этилган. Энг юқори нарх Гонконгда кузатилмоқда — бир литр учун 3,269 доллар.

Марказий Осиё давлатларида қандай кўрсаткич?

1. Туркманистон — 0,0429 доллар (дунё бўйича 8-ўрин)

2. Қозоғистон — 0,507 доллар (11-ўрин)

3. Қирғизистон — 0,874 доллар (30-ўрин)

4. Ўзбекистон — 0,986 доллар (42-ўрин)

Тожикистон ҳақидаги маълумотлар порталга киритилмаган. 2024 йил 2 сентябрь ҳолатига кўра, дунёда Аи-95 бензинининг ўртача нархи бир литр учун 1,31 долларни ташкил этади. Бензин нархининг бундай ўзгариши кўп жиҳатдан ёнилғи солиғининг миллий тузилмалари ва субсидиялаш сиёсатидаги фарқлар билан изоҳланади.