Бугун, 7 октябрь куни АОКАда бўлиб ўтган брифингда Олий суди Жамоатчилик билан алоқалар маркази бошлиғи Азиз Обидов қандай шахслар фарзандликка олувчилар бўлиши мумкин эмаслиги юзасидан ахборот берди.
Қуйидаги шахслар фарзандликка олувчилар бўлиши мумкин эмас:
- ота-оналик ҳуқуқидан маҳрум қилинган ёки ота-оналик ҳуқуқи чекланганлар;
- қонун билан белгиланган тартибда муомалага лаёқатсиз ёки муомала лаёқати чекланган деб топилганлар;
- асаб касалликлари ёки наркология муассасаларида рўйхатда турувчилар;
- фарзандликка олувчи ва фарзандликка олинувчилар ёшидаги фарқ ўн беш ёшдан кам бўлса (ўгай ота ва ўгай она томонидан фарзандликка олиш ҳоллари бундан мустасно).
Шунингдек, чет эл фуқароси ёки фуқаролиги бўлмаган шахс томонидан Ўзбекистон Республикасининг фуқароси бўлган болани фарзандликка олиш ҳақида ариза берилиши мумкин. Бундай ишни кўриб чиқишда суд нафақат аризачи фуқароси ҳисобланган давлатнинг қонунчилиги, балки Ўзбекистон Республикасининг халқаро шартномаларини инобатга олган ҳолда Ўзбекистон Республикасининг қонунчилиги талабларидан ҳам келиб чиқади.
Фарзандликка олиш бўйича кўрилаётган суд ишида иштирок этувчи шахслар уларга маълум бўлган фарзандликка олиш билан боғлиқ маълумотларни сир сақлашлари зарурлиги, шунингдек фарзандликка олиш сирини фарзандликка бола олувчиларнинг ёки васийлик ва ҳомийлик органининг эркига қарши ошкор қилганлик учун Жиноят кодексига биноан жиноий жавобгарликка тортилишлари мумкинлиги тўғрисида огоҳлантирилади.
Маълумот учун, 2023 йил мобайнида фуқаролик ишлари бўйича судлар томонидан болани оилага фарзандликка олиш билан боғлиқ 5 минг 359 та иш кўрилиб, тамомланган. Шундан 5 минг 11 та даъво ариза қаноатлантирилган.
Жорий йилнинг биринчи ярим йиллигида айнан шу тоифадаги 2 минг 701 та иш кўрилиб, тамомланган ва 2 минг 543 та даъво ариза қаноатлантирилган.
Изоҳ (0)