Таниқли хонанда Муниса Ризаева Instagram аккаунтлардан бирига берган интервьюсида бир неча йил аввал турли руҳий муаммоларга учрагани, ҳатто жонига қасд қилишга урингани ҳамда шахсий ҳаёти ҳақида сўзлаб берди.
Арсенийга турмушга чиқишга қандай қарор қабул қилгани ҳақида
— Буни Аллоҳдан сўрадим. “Аллоҳим, агар шу менинг инсоним бўлса, унга турмушга чиқишимга йўл бер. Агар у менинг инсоним бўлмаса, унинг ҳам, менинг ҳам қалбимга озор етказмай, бир-биримиздан узоқлаштир”, деб илтижо қилдим. Чунки мен эрга тегишни умуман хоҳламасдим. Йўқ, хоҳлардим, лекин бу нарса мен учун биринчи ўринда эмас эди. Агар муносиб инсонни учрацам, шукр, учратмасам ҳам, шукр. Агар фарзанд берса, Аллоҳга шукр айтаман, бермаса ҳам, нолимайман. Демак, бу Аллоҳнинг иродаси, дейман. Чунки инсон доимо шукр қилиб яшаши керак. Ҳаётимиздаги ҳар бир яхши ёки ёмон нарсага ҳам Аллоҳга шукр қилишимиз керак. Чунки ҳаммаси яхшиликка. Авваллари бирор муаммога дуч келсам, сиқилиб йиғлардим. Ҳозир эса қандайдир мушкулот бўлса, демак, бу Аллоҳнинг иродаси, дейман ва шукр айтаман.
— Беларусь миллатига мансуб йигитга турмушга чиққаним учун ижтимоий тармоқларда менга ва турмуш ўртоғимга нисбатан жуда кўп негатив ёзилди. Улар ҳатто турмуш ўртоғимнинг исломни қабул қилганига ҳам қараб ўтирмади. Инсонлар учун бу нарсанинг ҳеч қандай қадр-қиммати йўқ экан. Менга эса бу катта бахт. Чунки мен бир инсоннинг мусулмон бўлишига сабабчи бўлдим. Турмуш ўртоғим негативлардан жудаям асабийлашади. Мен унга “Умуман эътибор берма”, дейман. Мен ташқи оламга умуман эътибор бермайман.
Фарзанд кўриш орзуси ҳақида
— Охирги пайтларда “капелница” олаётган видеоларимни кўп жойлаяпман. Бу менинг касал эканлигимни билдирмайди. Биз эрим билан ота-она бўлишни жуда ҳам хоҳлаяпмиз. Шунинг учун мен профилактик муолажалар олиб, оналикка тайёрланяпман.
Аллоҳга осон, у ўзи билади қачон кимга нимани беришни. Фарзандни ҳам у ўзи истаган пайтда беради. Мен аввалроқ она бўлишга тайёр эдим, деб айта олмайман. Мен ҳар доим она бўлишга менда ҳамма нарса бўлганидагина тайёр бўламан, дердим. “Менга мана бу, у ёки бу нарса керак, шундагина она бўламан”, дердим. Чунки мен фарзандимга маълум шароитлар яратиб бера олишим керак. Аллоҳ менинг режаларимни билади. Лекин унинг ҳам менга тегишли режалари бор.
Руҳий муаммолари ҳақида
— Бир неча йил аввал шундай вазият бўлганки, ҳатто ўзимни ўлдирмоқчи бўлганман. Ҳамма ишни ўзим қилганим, ҳамма муаммойимни ўзим ҳал қилишга уринганим учун ҳаётимга фақат кучсиз эркаклар кириб кела бошлаган. Шундай вақтлар бўлганки, ҳатто ич-ичимдан ўзимни эркаклардек ҳис этганман. Дўстларим Муниса, сен “мужиксан” деса, бу гап мен учун фахр эди. Ҳозир эса мен ўзгарганман, ҳатто кўпчилик нигоҳларим, қарашларим ҳам ўзгарганини айтмоқда.
Маълумот учун, 37 ёшли Муниса Ризаева 2023 йилнинг 7 сентябрь куни беларуслик тадбиркор Арсений Морозга турмушга чиқди. Хонанданинг тўйига нафақат ўзбекистонлик, балки чет эллик санъаткорлар ҳам ташриф буюрди.
Изоҳ (0)