Қорақалпоғистондаги “Шохпахта” газ кони бўйича тузилган маҳсулот тақсимоти тўғрисидаги битим муддати тугагани сабабли “Газпром” конни тарк этди. Бу ҳақда “Интерфакс” хабар берди.
Битимнинг амал қилиш муддати 2024 йил 31 июлда тугаган. Шу сабабли “Газпром зарубежнефтегаз” акциядорлик жамияти ўтган йили кондаги фаолиятини тўхтатган.
“Шохпахта” кони 1962 йилда Қорақалпоғистоннинг Қўнғирот тумани ҳудудидаги Устюрт платосининг жануби-шарқий қисмида очилган. Конни реконструкция қилиш “Газпром” компаниясининг Ўзбекистондаги илк лойиҳасидир. У 2004 йилда 15 йиллик муддатга имзоланган Маҳсулотни тақсимлаш ҳақидаги битим шартлари асосида амалга оширилган.
2018 йил 30 август куни президент “Шохпахта” конида газ ишлаб чиқариш лицензиясини яна 5 йилга узайтириш бўйича фармонни имзолаган. Лицензия муддатини яна 5 йилга узайтириш нияти ўша йилнинг май ойида Россиядаги Халқаро иқтисодий форумда “Ўзбекнефтгаз” ва “Газпром” ўртасида тегишли ҳужжатнинг имзоланиши орқали тасдиқланган. 2018 йилнинг 20 августида Ўзбекистон президент айни масала юзасидан тегишли қарорни имзолаган.
“Нефтьэгаз.ру” портали маълумотларига кўра, “Шохпахта”да сўнгги йилларда йилига 350 миллион куб метр газ қазиб олинган. 2023 йил июнь ойида Ўзбекистон “Газпром” билан газ сотиб олиш бўйича икки йиллик шартнома тузди, кунлик етказиб бериш ҳажми 9 миллион куб метрни, йиллик ҳажми эса қарийб 2,8 миллиард куб метрни ташкил этади. Ушбу шартнома бўйича етказиб бериш 2023 йил 7 октябрда бошланган.
Изоҳ (0)