Шавкат Мирзиёев 7 апрель куни Парламентлараро иттифоқнинг 150-юбилей ассамблеясида Россия делегациясига раҳбарлик қилаётган Россия Федерал Мажлиси федерация кенгаши раиси Валентина Матвиенкони қабул қилди.
Президент матбуот хизматининг маълум қилишича, учрашув аввалида давлат раҳбари Валентина Матвиенкони туғилган куни билан табриклаб, унга мустаҳкам соғлик, бахт-саодат ва муваффақиятлар тилади.
Федерация кенгаши раиси Ўзбекистон етакчисига самимий миннатдорлик билдириб, Россия президенти Владимир Путиннинг саломи ва энг эзгу тилакларини етказди.
Ўзбекистон билан Россия ўртасидаги кенг қамровли стратегик шериклик ва иттифоқчилик муносабатларини янада мустаҳкамлаш масалалари кўриб чиқилди. Парламентлараро алоқалар самарали бўлаётгани юксак баҳоланди. Олий даражада эришилган келишувлар ижроси устидан парламент назорати бўйича фаол ҳамкорликни давом эттириш муҳим экани таъкидланди.
-BhygBbkn.avif)
Савдо-иқтисодий шериклик суръатини таъминлаш, саноат кооперацияси лойиҳалари ва гуманитар алмашинув дастурларини қўллаб-қувватлашга алоҳида эътибор қаратилди.
Марказий Осиё тарихида илк маротаба Тошкент шаҳрида Парламентлараро иттифоқнинг 150-юбилей ассамблеяси бўлиб ўтмоқда. 2024 йилнинг март ойида Швейцариянинг Женева шаҳрида Парламентлараро иттифоқ бош котиби Мартин Чунгонг ва Ўзбекистон Олий Мажлис Сенати раиси Танзила Норбоева ўртасида ПИнинг 150-юбилей ассамблеясини 2025 йил Ўзбекистонда ўтказиш тўғрисида битим имзоланганди. 30 январь куни Олий Мажлис Сенатида ушбу ассамблеяни ўтказиш бўйича ташкилий қўмита йиғилишида Танзила Норбоева мазкур тадбир фақатгина парламентаризм ва барқарор ривожланишнинг ижобий тажрибаси юқори бўлган мамлакатлардагина ўтказилишини таъкидлаганди.
5 апрель куни Парламентлараро иттифоқнинг 150-юбилей ассамблеяси Тошкент шаҳрида ўз ишини бошлади. 6 апрелда Парламентлараро иттифоқнинг 150-юбилей ассамблеясининг “Ижтимоий тараққиёт ва адолат учун парламент ҳаракати” мавзусидаги биринчи ялпи мажлиси бўлиб ўтди.
Изоҳ (0)