Parlamentlararo ittifoqning 150-yubiley assambleyasi Shavkat Mirziyoyevning taklifiga asosan 2025-yil 5—9-aprelda O‘zbekistonda bo‘lib o‘tadi. Bu haqda Senat matbuot xizmati xabar berdi.
30-yanvar kuni Oliy Majlis Senatida ushbu assambleyani o‘tkazish bo‘yicha Tanzila Norboyeva boshchiligida tashkiliy qo‘mita yig‘ilishi bo‘lib o‘tdi. Yig‘ilishda O‘zbekistonning Parlamentlararo ittifoqqa aʼzoligi 2017-yilda qayta tiklangani, o‘tgan qisqa davr mobaynida mamlakat parlamentarizm va barqaror rivojlanish sohasida juda katta tajribaga erishgani, Respublika yutuqlari yirik xalqaro tashkilotlar va xorijiy mamlakatlar tomonidan alohida eʼtirof etilayotgani taʼkidlab o‘tildi.
190 ga yaqin mamlakatlar parlamentini birlashtirib kelayotgan Parlamentlararo ittifoq assambleyasi yilda ikki marotaba o‘tkaziladi. Mazkur tadbir faqatgina parlamentarizm va barqaror rivojlanishning ijobiy tajribasi yuqori bo‘lgan mamlakatlardagina o‘tkaziladi.
Parlamentlararo ittifoqning 150-assambleyasining O‘zbekistonda bo‘lib o‘tishi tarixiy voqelikdir, chunki bunday tadbir Markaziy Osiyo mintaqasida ilk marotaba o‘tkazilyapti.
“Ijtimoiy taraqqiyot va adolat uchun parlament harakati” mavzusida o‘tkaziladigan assambleyaning turkum yig‘ilishlarida butun dunyo parlament delegatsiyalari tomonidan:
- aholini ijtimoiy himoya qilish va kambag’allikni qisqartirish;
- qonun ustuvorligini ta’minlash;
- inson huquqlarini himoya qilish;
- gender tenglikni ta’minlash;
- ilm-fan, texnologiyani rivojlantirish va yoshlarni qo‘llab-quvvatlash kabi dolzarb masalar muhokama qilinadi.
Shuningdek, bir hafta davomida Parlamentlararo ittifoqning qo‘mitalari tomonidan inson huquqlarini himoya qilish, gender tenglikni taʼminlash, ilm-fan va texnologiya, yoshlar masalalariga bag‘ishlangan turli tadbirlar tashkil etilishi rejalashtirilmoqda.
Parlamentlararo ittifoqning 150-assambleyasining O‘zbekistonda o‘tkazilishi:
- dolzarb masalalar bo‘yicha o‘zaro tajriba almashish, O‘zbekiston parlamenti faoliyati bilan tanishish;
- 2030-yilgacha bo‘lgan strategiyani amalga oshirishda parlamentlarning ishtirokini kengaytirish;
- barqaror rivojlanish maqsadlariga erishish;
- inson huquqlari;
- gender tengligi;
- yoshlar imkoniyatlarini kengaytirish;
- iqlim o‘zgarishiga qarshi kurashda parlamentlar hamkorligini ko‘rib chiqish imkonini beradi.
Shveysariyaning Jeneva shahrida Parlamentlararo ittifoq bosh kotibi Martin Chungong va O‘zbekiston Oliy Majlis Senati raisi Tanzila Norboyeva o‘rtasida PIning 150-yubiley assambleyasini 2025-yil O‘zbekistonda o‘tkazish to‘g‘risida bitim imzolangandi.
Parlamentlararo Ittifoq haqida
Parlamentlararo Ittifoq 1889-yilda ta’sis etilgan bo‘lib, xalqaro tashkilotlar orasida yoshi eng ulug‘idir. Bu nufuzli tashkilot dunyo parlamentlarining yetakchi xalqaro organi sifatida mamlakatlarni o‘zida birlashtirgan. 1971-yildan buyon bosh qarorgohi Jenevada joylashgan.
A’zo parlamentlar va ularning deputatlari o‘rtasida yuksak qadriyatlarni ilgari suradigan ushbu tashkilot barcha millatlar o‘rtasida hamkorlik va muloqotni rag‘batlantirib kelmoqda. Ayni vaqtda tinch va hamjihat kelajakni ta'minlash uchun samarali qarorlar qabul qilish yo‘lida xizmat qilmoqda.
Izoh (0)