Тошкент шаҳрида 30 ноябрь куни “Ўзбекистон” халқаро анжуманлар саройида Барқарор ривожланиш мақсадларини амалга оширишда парламентлараро ҳамкорлик бўйича II Глобал форуми бўлиб ўтди.
Анжуман ишида парламентлараро ҳамкорлик, гендер ва ёшлар сиёсати ҳамда парламент ва фуқаролик жамияти ўртасидаги ўзаро ҳамкорлик мавзуларидаги учта сессия бўлиб ўтди.
Парламентлараро иттифоқ бош котиби Мартин Чунгонг анжуман иштирокчиларига видеомурожаат қилди. У таклиф ва хулосалар парламент ҳамда фуқаролик жамияти институтлари фаолиятига ижобий таъсир қилишини таъкидлаб ўтди.
Глобал форумда БМТ Бош ассамблеясининг “Барқарор ривожланиш мақсадларига эришишда фуқаролик жамияти иштирокини кенгайтириш тўғрисидаги” резолюцияси лойиҳаси муҳокама қилиниши катта воқелик. Бу резолюциянинг ташаббускори бўлган Ўзбекистонга бу ташаббус ва қатъият учун миннатдорчилик билдираман, — деди Мартин Чунгонг.
Олий Мажлис Сенати раиси Танзила Норбоева кириш сўзида ушбу сиёсий форум мамлакатларнинг эришган натижаларини халқаро ҳамжамиятга етказишда, ўзаро тажриба алмашишда муҳим мулоқот майдони бўлиб хизмат қилаётганини айтиб ўтди,
Албатта, бугунги натижалар бизга кифоя, шу билан қаноатланиб қоламиз, деган фикрдан йироқмиз. Олдимизда ҳали турган вазифалар етарлича.
Айниқса, фуқаролик жамият институтларининг ривожланиш даражаси ҳали бизни қониқтирмайди. Миллий мақсадларга эришишда, жамиятдаги масъулият ва сафарбарлик ҳиссини янада кучайтиришимиз лозим. Хусусан, БМТ бош котиби Антониу Гутерриш таъкидлаганидек, фуқаролик жамияти ва хусусий сектор вакиллари барқарор ривожланиш мақсадларига эришиш йўлида курашга сафарбар бўлишлари керак.
Ўзбекистонда барқарор ривожланиш доирасида ўтказилаётган тадбирлар ҳам энг аввало ушбу мақсадларга йўналтирилган, — деди Танзила Норбоева.
Бирлашган Миллатлар Ташкилоти Тараққиёт дастурининг Ўзбекистондаги доимий вакили Рам Аэр айтишича, анжуманда таълим тизими самарадорлигини ошириш, айниқса, инклюзив таълимга эътибор, камбағалликка барҳам бериш бўйича муҳим фикр-мулоҳазалар билдирилди.
.png)
Бугунги иккинчи глобал форум иштирокчилари ўз фаолиятлари давомида амалга ошираётган ишлари ҳақида маълумотлар бериш билан бирга, ўзаро тажриба алмашиш имконига эга бўлди. Буларни амалга ошириш одамлар манфаатига хизмат қилади. Мана шундай хайрли мақсадларни биз ҳам қўллаб-қувватлаймиз. Таълим ривожида нанотехнологиялардан кенгроқ фойдаланиш мақсадга мувофиқ, — деди Рам Аэр.
Тадбир давомида Ўзбекистонда фаолият юритаётган нодавлат нотижорат ташкилотлари ташаббуси билан илгари сурилаётган “Барқарор ривожланиш мақсадларига эришишда фуқаролик жамияти институтлари иштирокини кенгайтириш тўғрисида”ги БМТ Бош ассамблеясининг резолюцияси лойиҳасини БМТда илгари суриш таклифи барча иштирокчилар томонидан қўллаб-қувватланди.
Барқарор ривожланиш мақсадлари нима?
Барқарор Ривожланиш Мақсадлари, ёки Глобал мақсадлар деб номланиб, қашшоқликни йўқ қилиш, сайёрани ҳимоя қилиш ва барча одамларга тинчлик ва фаровонлик олиб келишга қаратилган универсал чоралардир.
Мақсадлар БМТга аъзо барча давлатлар, шу жумладан, Ўзбекистон томонидан 2015 йил сентябрь ойида маъқулланган. Уларга 2030 йилга қадар эришилиши керак бўлган 17 та мақсад киритилган. Ўзбекистон 17 та мақсадга эришиш бўйича 16 мақсадни қабул қилган. Қолган битта мақсад денгиз йўли билан боғлиқ бўлгани учун мамлакатга тегишли эмас.
Изоҳ (0)