Швейцариянинг Женева шаҳрида Парламентлараро иттифоқ (ПИ) бош котиби Мартин Чунгонг ва Ўзбекистон Олий Мажлис Сенати раиси Танзила Норбоева ўртасида ПИнинг 150-юбилей ассамблеясини 2025 йил Ўзбекистонда ўтказиш тўғрисида битим имзоланди. Бу ҳақда Сенат ахборот хизмати хабар бермоқда.
Президенти Шавкат Мирзиёев Парламентлараро иттифоқнинг 150-юбилей ассамблеясини Ўзбекистонда ўтказиш ташаббусини билдирган эди.
Жаҳондаги 180 та парламентни бирлаштирган ушбу нуфузли тузилма ўзининг юқори органи Ассамблеяни парламентаризм ва барқарор ривожланишнинг ижобий тажрибаси мавжуд бўлган мамлакатларда ўтказади.
Минтақамизда парламент йўналишидаги бундай кенг кўламли тадбирнинг илк бор ўтиши Ўзбекистон парламентининг барқарор ривожланиш мақсадларини амалга оширишдаги фаол иштироки билан изоҳланади, — дейилади юқори палата ахборотида.
Парламентлараро иттифоқ ассамблеясининг Ўзбекистонда ўтказилиши:
- долзарб масалалар бўйича ўзаро тажриба алмашиш, Ўзбекистон парламенти фаолияти билан танишиш;
- 2030 йилгача бўлган стратегияни амалга оширишда парламентларнинг иштирокини кенгайтириш;
- барқарор ривожланиш мақсадларига эришиш;
- инсон ҳуқуқлари;
- гендер тенглиги;
- ёшлар имкониятларини кенгайтириш;
- иқлим ўзгаришига қарши курашда парламентлар ҳамкорлигини кўриб чиқиш имконини беради.
Аввалроқ Парламентлараро иттифоқ билан ҳамкорликда Бухоро шаҳрида Барқарор ривожланиш мақсадларига бағишланган Халқаро парламент форуми ҳамда Тошкент шаҳрида Парламентлараро иттифоққа аъзо давлатлар парламентлари аёл раҳбарлари 14-саммити ўтказилган.
Изоҳ (0)