Парламентлараро иттифоқнинг 150-юбилей ассамблеяси Шавкат Мирзиёевнинг таклифига асосан 2025 йил 5—9 апрелда Ўзбекистонда бўлиб ўтади. Бу ҳақда Сенат матбуот хизмати хабар берди.
30 январь куни Олий Мажлис Сенатида ушбу ассамблеяни ўтказиш бўйича Танзила Норбоева бошчилигида ташкилий қўмита йиғилиши бўлиб ўтди. Йиғилишда Ўзбекистоннинг Парламентлараро иттифоққа аъзолиги 2017 йилда қайта тиклангани, ўтган қисқа давр мобайнида мамлакат парламентаризм ва барқарор ривожланиш соҳасида жуда катта тажрибага эришгани, Республика ютуқлари йирик халқаро ташкилотлар ва хорижий мамлакатлар томонидан алоҳида эътироф этилаётгани таъкидлаб ўтилди.
190 га яқин мамлакатлар парламентини бирлаштириб келаётган Парламентлараро иттифоқ ассамблеяси йилда икки маротаба ўтказилади. Мазкур тадбир фақатгина парламентаризм ва барқарор ривожланишнинг ижобий тажрибаси юқори бўлган мамлакатлардагина ўтказилади.
Парламентлараро иттифоқнинг 150-ассамблеясининг Ўзбекистонда бўлиб ўтиши тарихий воқеликдир, чунки бундай тадбир Марказий Осиё минтақасида илк маротаба ўтказиляпти.
“Ижтимоий тараққиёт ва адолат учун парламент ҳаракати” мавзусида ўтказиладиган ассамблеянинг туркум йиғилишларида бутун дунё парламент делегациялари томонидан:
- аҳолини ижтимоий ҳимоя қилиш ва камбағалликни қисқартириш;
- қонун устуворлигини таъминлаш;
- инсон ҳуқуқларини ҳимоя қилиш;
- гендер тенгликни таъминлаш;
- илм-фан, технологияни ривожлантириш ва ёшларни қўллаб-қувватлаш каби долзарб масалар муҳокама қилинади.
Шунингдек, бир ҳафта давомида Парламентлараро иттифоқнинг қўмиталари томонидан инсон ҳуқуқларини ҳимоя қилиш, гендер тенгликни таъминлаш, илм-фан ва технология, ёшлар масалаларига бағишланган турли тадбирлар ташкил этилиши режалаштирилмоқда.
Парламентлараро иттифоқнинг 150-ассамблеясининг Ўзбекистонда ўтказилиши:
- долзарб масалалар бўйича ўзаро тажриба алмашиш, Ўзбекистон парламенти фаолияти билан танишиш;
- 2030 йилгача бўлган стратегияни амалга оширишда парламентларнинг иштирокини кенгайтириш;
- барқарор ривожланиш мақсадларига эришиш;
- инсон ҳуқуқлари;
- гендер тенглиги;
- ёшлар имкониятларини кенгайтириш;
- иқлим ўзгаришига қарши курашда парламентлар ҳамкорлигини кўриб чиқиш имконини беради.
Швейцариянинг Женева шаҳрида Парламентлараро иттифоқ бош котиби Мартин Чунгонг ва Ўзбекистон Олий Мажлис Сенати раиси Танзила Норбоева ўртасида ПИнинг 150-юбилей ассамблеясини 2025 йил Ўзбекистонда ўтказиш тўғрисида битим имзоланганди.
Парламентлараро Иттифоқ ҳақида
Парламентлараро Иттифоқ 1889 йилда таъсис этилган бўлиб, халқаро ташкилотлар орасида ёши энг улуғидир. Бу нуфузли ташкилот дунё парламентларининг етакчи халқаро органи сифатида мамлакатларни ўзида бирлаштирган. 1971 йилдан буён бош қароргоҳи Женевада жойлашган.
Аъзо парламентлар ва уларнинг депутатлари ўртасида юксак қадриятларни илгари сурадиган ушбу ташкилот барча миллатлар ўртасида ҳамкорлик ва мулоқотни рағбатлантириб келмоқда. Айни вақтда тинч ва ҳамжиҳат келажакни таъминлаш учун самарали қарорлар қабул қилиш йўлида хизмат қилмоқда.
Изоҳ (0)