Японияда июль ойида кучли зилзила кузатилишини башорат қилган комикс сабаб сайёҳлар оқими камайиб кетди. Бу ҳақда CNN хабар берди.
“Тhе Future I Saw” номли комикс Шарқий Осиё давлатларидан, хусусан, Хитой, Гонконг, Таиланд ва Вьетнамдан келадиган сайёҳлар сонига таъсир кўрсатди. Комикс муаллифи Рё Тацуки ҳисобланади. Унинг башорати 2011 йилги Toҳoку зилзиласи ва цунами каби воқеаларни олдиндан аниқ айтиб берган комикслари сабабли ваҳимага сабаб бўлмоқда.
Маълум қилинишича, Гонконгдан Японияга саёҳатлар 2025 йилги Пасха байрамида 50 фоизга камайган. Хитой ва бошқа мамлакатларда ҳам саёҳатларни бекор қилиш ҳолатлари кўпайган.
Бундан ташқари, психиклар, фенг шуи мутахассислари ва ижтимоий тармоқларда тарқалган башоратлар қўшимча хавотирни кучайтирган.
Япония ҳукумати ва геологлар бундай башоратларнинг илмий асосга эга эмаслигини таъкидлаб, сайёҳларни расмий маълумотларга таянишга чақирмоқда.
Шунга қарамай, бу “прогноз эффекти” Япониянинг туризм саноатига сезиларли таъсир кўрсатмоқда. Маълумот учун, 2025 йилнинг биринчи чорагида Японияга 10 миллиондан ортиқ сайёҳ ташриф буюрган. Бу эса мамлакатга бўлган умумий ишончни кўрсатмоқда. Шу билан бирга, ижтимоий тармоқлар ва башоратлар туризмга таъсир қилишини ҳам кўрсатди.
Изоҳ (0)