Эрон олий раҳнамоси ва диний етакчиси 82 ёшли Оятуллоҳ Али Хоманаий мамлакатда ишлаб чиқарилган «Эрон Баракат» коронавирусга қарши вакцинасининг биринчи дозасини олди. Бу ҳақда раҳбарнинг расмий сайтига таяниб «Gazeta.ru» хабар берди.
«Ўз билим ва тажрибаларини қўллаган ҳолда мамлакат учун коронавирусга қарши вакцинани қўллаш имконини яратган барчага миннатдорлик билдираман», — деди у вакцина олганидан сўнг.
Аввалроқ Эронда аҳолини коронавирусга қарши маҳаллий «Эрон Баракат» вакцинаси билан эмлаш бошланган эди. 9 июнь куни Эрон ҳукумати вакили Али Рабий республика соғлиқни сақлаш тизими Эрон вакциналаридан фойдаланиш имкониятига эга бўлгач, мамлакатда вакцинация дастури жадал кенгайишини айтган.
Tengrinews хабар беришича, Қозоғистон биринчи президенти Нурсултон Назарбоев ҳам коронавирусга қарши эмланди.
Қайд этилишича, Назарбоев Қозоғистоннинг Қарағанда фармацевтика заводида ишлаб чиқарилган «Спутник V» вакцинасининг биринчи компонентини олган.
Эмланганидан сўнг Назарбоев қозоғистонликларга санитария-эпидемиологик хавфсизлик чораларини кўришга ва вакцинацияда фаол бўлишга чақирди.
«Ҳозирга қадар Қозоғистонда уч миллионга яқин одам эмланди. Бугун мен ҳам коронавирусга қарши вакцина олдим. Мен барча қозоғистонликларни вакцинацияни фаол равишда давом эттиришга ва эмланишдан қўрқмасликка чақираман. Вируснинг янги штаммлари пайдо бўлаётгани сабабли ҳозирда вакцина олиш жуда муҳим. Бу ўз соғлиғингиз учун керак. Биз қийин даврда яшаяпмиз. Буларнинг барчасини биргаликда енгиб ўтишимиз зарур. Ҳаммага чин дилдан соғлиқ ва фаровонлик тилайман», — деди Нурсултон Назарбоев.
Аввалроқ Қозоғистон пойтахти Нур-Султонда карантин чоралари кучайтирилгани ҳақида хабар берилганди. Шунингдек, пойтахтда коронавируснинг «ҳиндча» штамми қайд этилган.
Эслатиб ўтамиз, апрель бошида Қозоғистон президенти Қосим-Жўмарт Тўқаев ҳам коронавирусга қарши Қарағанда фармацевтика заводида ишлаб чиқарилган «Спутник V» вакцинаси билан эмланган.
Изоҳ (0)