Эрон олий раҳнамоси Европа давлатларида Қуръоннинг ёқиб юборилишига муносабат билдирди  

Эрон олий раҳнамоси Оятуллоҳ Али Хоманаий Европа давлатларида Қуръон китоби ёқилгани ва йиртиб ташланганини қоралади. Бу ҳақда Иран Пресс хабар берди.

Хоманаийнинг сўзларига кўра, сўз эркинлиги шиори остида амалга оширилаётган бундай ҳаракатлар Ислом ва Қуръон дунёда асосий нишон эканини кўрсатади.

“Бундай фитналарга қарамай, келажак Исломга тегишли”, — таъкидлади олий раҳнамо.

У дунё бўйлаб эркинлик изловчиларни муқаддас нарсаларни ҳақорат қилиш ва нафрат тарқатишдек “ёвуз сиёсат”га қарши мусулмонлар билан бирга туришга чақирди.

Туркия президенти Ражаб Тоййиб Эрдўғон ҳам Стокгольмда Қуръон ёқиб юборилганига муносабат билдириб, Швеция энди НАТОга аъзоликда қўллаб-қувватланмаслигини айтди. 

“Туркиянинг Стокгольмдаги элчихонаси олдида бундай шармандаликка йўл қўйганлар НАТОга аъзо бўлиш ҳақидаги аризаларида биздан ҳеч қандай илтифот кутмаслиги керак. Швеция Туркияни, шунингдек, мусулмонларнинг диний туйғуларини ҳурмат қилмаса, НАТОга аъзо бўлиш борасида биздан ҳеч қандай ёрдам олмайди.

Швецияда содир этилган жирканч ҳаракат мусулмонларнинг ҳуқуқ ва эркинликларини ҳурмат қиладиган ҳар бир шахсга нисбатан ҳақоратдир. Агар Швеция террорчи ташкилот аъзолари ва Ислом душманларини шу қадар қўллаб-қувватлаётган бўлса, биз унга ўз мамлакати мудофаасини уларга ишониб топширишни маслаҳат берамиз”, — деган Туркия раҳбари.

21 январь, шанба куни Швециянинг ултраўнгчи “Қаттиқ келишув” партияси етакчиси Расмус Палуда Туркиянинг Стокгольмдаги элчихонаси ёнида Қуръонни омма олдида ёқиб юборди.

Швеция расмийларининг ҳаракатларига жавобан Анқара Швеция мудофаа вазири Пал Жонсоннинг Туркияга кутилаётган ташрифини бекор қилди.

Швециянинг Анқарадаги элчиси Стаффан Хёррстрем Туркия Ташқи ишлар вазирлигига чақирилиб, Швеция расмийлари томонидан Стокгольмдаги Туркия элчихонаси олдида Қуръонни ёқиш учун акция ўтказишга рухсат берилгани муносабати билан унга кескин норозилик билдирилди. Швеция ҳукумати томонидан Қуръонни таҳқирлаш актини амалга оширишга рухсат берилгани кўплаб ислом давлатларининг кескин салбий муносабатига сабаб бўлди.

23 январь куни Нидерландияда “Ватанпарвар европаликлар Ғарбнинг исломлашувига қарши” (ПЕГIDА) ҳаракати етакчиси Эдвин Вагенсвелд Гаагадаги Нидерландия Вакиллар палатаси биноси олдида Қуръон китобини омма олдида йиртиб, ёқиб юборган.