Исроил ҳарбий-денгиз кучлари 10 июнь куни Яманнинг ҳусийлар назоратидаги Ҳодейда порт шаҳрига зарба берганини маълум қилди. Бу ҳақда Euronews хабар берди.
Ҳужум ҳақида ҳусийлар “Ал-Масираҳ” ахборот канали орқали маълум қилган. Унда айтилишича, ҳужум Ҳодейдадаги докларга қаратилган, тафсилотларга берилмаган. Бу ҳудуд оч, урушдан азият чеккан халққа ёрдам жўнатиш учун жуда муҳим порт ҳисобланади.
2023 йил октябрь ойида Ғазода уруш бошланганидан бери ҳусийлар Исроилга қарата бир неча бор ракета ва дронлар учирган. Шунингдек, исёнчилар фаластинликлар билан бирдамлик ҳаракати сифатида таърифлаган тижорат кемаларига ҳужумлар уюштирган.
9 июнь куни кечқурун Исроил яманликларни Рас-Иса, Ҳодейда ва ас-Салиф портларидан эвакуация қилиш ҳақида онлайн огоҳлантирганди.
“Портдан қурол-яроғларни ўтказиш учун фойдаланилади. Бу эса ҳусийлар режимининг террорчилик фаолиятини илгари суриш учун фуқаролик инфратузилмасидан сурбетларча фойдаланишига яна бир мисолдир”, дейилади Исроил ҳарбийларининг баёнотида.
Ҳодейда, шунингдек, 2014 йилда ҳусийлар Яман пойтахти Санани эгаллаб олганидан бери миллионлаб яманликлар учун озиқ-овқат ва бошқа гуманитар ёрдам учун асосий кириш нуқтаси ҳисобланади.
Исроил мудофаа вазири Исраэл Кац агар Исроилга ҳужумлар давом этса, ҳусийларга денгиз ва ҳаво блокадаси билан таҳдид қилган.
“Биз ҳусийлар террорчилик ташкилотини улар Исроилга ўқ узишда давом этган тақдирда, жиддий қаршиликка дуч келиши ҳамда денгиз ва ҳаво блокадаси ҳақида огоҳлантирдик”, деган вазир.
Ҳусийлар Исроил томонга учирган ракета ва дронларнинг аксарияти нишонга тегмаган ёки уриб туширилган. Исроил қўшинлари бунга жавобан бир неча бор ҳаво ҳужумларини амалга оширган, жумладан, Саана халқаро аэропортига ҳужумлар уюштирилганди.
2023 йил ноябридан 2025 йил январигача ҳусийлар ракета ва дронлар билан 100 дан ортиқ савдо кемаларига ҳужум қилиб, улардан 2 тасини чўктирган ва 4 нафар денгизчини ўлдирган. Бу Қизил денгиз йўлаги орқали савдо оқимини сезиларли даражада камайтирган. Одатда ҳар йили денгиз орқали 1 триллион доллар миқдоридаги товарлар ўтарди.
Изоҳ (0)