Ўзбекистон делегациясининг Венгрияга ташрифи доирасида инвестициялар, саноат ва савдо вазири Лазиз Қудратов Иқтисодий ҳамкорлик бўйича Ўзбекистон—Венгрия ҳукуматлараро комиссиясининг 8-йиғилишида ва унинг доирасида ташкил этилган қўшма бизнес форумида иштирок этгани баробарида қатор икки томонлама учрашув ва музокаралар ўтказди. Бу ҳақда “Дунё” агентлиги хабар берди.
Қайд этилишича, йиғилиш доирасида икки мамлакатнинг 200 дан ортиқ ишбилармон ва расмий доиралари вакиллари иштирокида бизнес форуми ҳам бўлиб ўтган. Ўзбекистон томони инвесторларнинг қулай фаолият юритиши учун мамлакатда жорий этилган шарт-шароитларга доир маълумотларни тақдим этгани баробарида янги қўшма лойиҳа ва ташаббусларни ҳар томонлама қўллаб-қувватлашга тайёр эканини билдирган.
Венгрия ташқи ишлар вазири Петр Сийярто билан бўлиб ўтган музокаралар чоғида суҳбатдош Ўзбекистон билан дўстлик ва самарали икки томонлама ҳамкорликни мустаҳкамлаш борасида икки давлат раҳбарларининг қатъий сиёсий иродаси туфайли кўп қиррали муносабатлар тез суръатларда ривожланиб бораётганини юқори баҳолаган.
Икки мамлакат ўртасидаги муносабатларни фаоллаштириш мақсадида Тошкент ва Будапешт шаҳарлари ўртасида тўғридан тўғри авиақатновларни йўлга қўйиш, шунингдек, ўзаро сайёҳлик оқимининг ўсишига ижобий таъсир кўрсатиши кутилаётган виза тартиб-таомилларини соддалаштиришга келишиб олинган.
Бундан ташқари, KESH, Gedeon Rixter, Meditop, Wizz Air, Bonafarm, Mall Group va Semmelweis University сингари Венгриянинг етакчи компания ва муассасалари раҳбарлари билан учрашувлар ўтказилган. Улар давомида ҳам қатор аниқ келишувларга эришилган.
2022 йил октябрда Шавкат Мирзиёев ва Венгрия Виктор Орбан Ўзбекистон ҳамда Венгрия ўртасидаги стратегик шерикликни ривожлантириш тўғрисида қўшма баёнот имзолаганди. 2023 йил март охирларида эса Будапешт шаҳрида Ўзбекистон элчихонаси очилди.
Изоҳ (0)