Венгриянинг Wizz Air авиакомпанияси Абу-Даби ва Тошкентни тўғридан-тўғри рейслар билан боғлайди, деб хабар бермоқда Uzbekistan Airports матбуот хизмати.
Қайд этилишича, биринчи йўловчи рейсини амалга ошириш 2023 йил 25 январга белгиланган. Парвозлар Airbus А320 ва А321 самолётларида ҳафтасига уч марта — душанба, чоршанба ва жума кунлари амалга оширилади.
13 декабрдан бошлаб Wizz Air Самарқанд аэропортига ҳафтасига икки марта — сешанба ва шанба кунлари парвозларни йўлга қўйишни режалаштирган.
«Ўзавиация» агентлиги берган маълумотга кўра, Ўзбекистон ҳукумати ва Бирлашган Араб Амирликлари ҳукумати ўртасида ҳаво қатнови тўғрисидаги битим асосида 30 августда ушбу авиакомпанияга Абу Даби—Тошкент —Абу Даби йўналишида мунтазам авиақатновларни амалга ошириш ҳуқуқини берувчи эксплуатацион рухсатномаси берилганди.
Wizz Air — Венгриянинг арзон авиакомпанияси бўлиб, штаб-квартираси Венгрия пойтахти, Будапештда жойлашган. Ўзбекистон Wizz Air лоукастерини 2019 йилдан буён чорлаб келмоқда. 2021 йил сентябрь ойида авиакомпания Будапештдан Тошкент, Бухоро ва Самарқандга парвозларни йўлга қўйишдан манфаатдор экани хабар қилинган эди.
Изоҳ (0)