Ўзбекистонда лоукостер форматидаги авиакомпания иш бошлади

Ўзбекистонда лоукостер форматидаги Centrum Air авиакомпанияси ўз ишини бошлади. Бу ҳақда Uzbekistan Airports матбуот хизмати «Дарё»га маълум қилди.

Маълум қилинишича, компаниянинг йўловчилар учун парвозлари Ўзбекистон ичида ҳам, чет эл мамлакатларида ҳам амалга оширилади. Centrum Air компаниясида 250 нафар маҳаллий ва 400 нафардан ортиқ хорижий мутахассис ишлайди.

Айни пайтда авиакомпания ҳар бири 180 кишига мўлжалланган бешта Boeing 737 ва А320 самолётлари ёрдамида йўловчиларга хизмат кўрсатади. 2023 йилда компания ўз паркини 20 та самолётга кенгайтиришни, кейинги уч йилда эса бу рақамни 100 тага етказишни режалаштирмоқда.

«Умид қиламизки, бизнинг авиакомпания тармоқ, ички туризм ва умуман фуқаролик авиацияси ривожига ўз муносиб ҳиссасини қўшади», — дейди компания бош директори Абдулазиз Абдураҳмонов.

Авиакомпания томонидан авиаташувлар 15 та мамлакатга, шу жумладан, Туркия, Саудия Арабистони, Миср, БАА, Ҳиндистон, Жанубий Корея ва бошқаларга амалга оширилади. Шунингдек, Тошкентдан Ўзбекистоннинг бешта шаҳри: Нукус, Урганч, Термиз, Наманган ва Фарғонага қўшимча рейсларни амалга оширади.

Шунингдек, Саудия Арабистони ва бошқа араб давлатларига Ҳаж зиёратини амалга оширмоқчи бўлган Ўзбекистон фуқаролари учун авиакомпания томонидан авиачипталарга қўшимча имтиёзлар берилади.

Лоукостер нима?

Кам бюджетли авиакомпания (лоукостер, дискаунтер) — эксплуатация харажатлари паст бўлган авиакомпания. Оддий қилиб айтганда, бир қатор омиллар ҳисобига чипталарни паст баҳода сотишга қурби етадиган авиаташувчи.