АҚШда 23 июнь куни очиқ ҳавода ўтказилган маросимдан сўнг жазирама туфайли 150 дан ортиқ кишининг аҳволи оғирлашди. Бу ҳақда BBC хабар берди.
Маросим Нью Жерси штати Патерсон шаҳрида бўлиб ўтган. Шаҳар мери 100 дан ортиқ одамнинг аҳволи оғирлашгач, фавқулодда ҳолат эълон қилган. Ҳудуддаги мактабларда битирув маросимларининг аксарияти бекор қилинган. Бундан ташқари, барча очиқ-осмон остидаги тадбирларга чекловлар ўрнатилган.
Аномал иссиқлик АҚШнинг ғарбидан шарқий қирғоғигача, шунингдек, Канаданинг Онтарио, Квебек ва Янги Шотландия ҳудудларига таъсир ўтказмоқда. Ҳафта давомида 160 миллиондан ортиқ одам иссиқлик таъсирида қолган.
Шимолий Каролина штатида ўнлаб одамлар жазирама сабабли шифохоналарга мурожаат қилган. Камида 41 киши, жумладан, болалар касалхонага ётқизилгани айтилмоқда.
Мутахассисларнинг огоҳлантиришича, Шимолий Американинг барча қисмларида ҳароратнинг кескин кўтарилиши, айниқса, юқори намлик иссиқлик билан боғлиқ касалликлар хавфини кучайтиради. Баъзи шарқий шаҳарларда ҳарорат кечаси +27 даражадан юқори бўлиши айтилган. Нью Йоркда 24 июнь куни ҳарорат +38 даражага етган. Бу 1966 йилдан бери шаҳарда қайд этилган энг юқори кўрсаткичдир.
Изоҳ (0)