БМТнинг Жаҳон метеорология ташкилоти чоршанба куни эълон қилган ҳисоботида таъкидланишича, сўнгги ўн йилликда Ер ҳарорати тарихий юқори чўққига етиб, атмосферадаги карбонат ангидрид миқдори эса сўнгги 800 минг йил ичидаги энг юқори даражани қайд этган.
Йиллик ҳисоботда сайёрамизда кучайиб бораётган исишнинг барча аломатлари акс эттирилган: океанлар ҳарорати рекорд даражада исиб, денгиз сатҳи кўтарилмоқда, музликлар мисли кўрилмаган тезликда эримоқда.
Агентлик БМТ Бош котиби Антониу Гутерришнинг “Сайёрамиз тобора тез-тез хавф сигналларини юбормоқда” деган сўзларини келтирган.
БМТ Жаҳон метеорология ташкилотининг йиллик ҳисоботи тўлалигича глобал исиш муаммосига бағишланган. Унда таъкидланишича, иқлим ўзгаришлари асосан инсон фаолияти, яъни кўмир, нефть ва газни қайта ишлаш билан боғлиқ. Олимлар 2024 йилни 175 йиллик кузатувлар тарихидаги энг иссиқ йил сифатида қайд этишмоқда.
Ҳисоботда глобал исиш экстремал об-ҳаво ҳодисалари сонининг кўпайишига олиб келгани, бу эса ўз навбатида сўнгги 16 йил ичида аҳолининг энг юқори миграция даражасини юзага келтирганини кўрсатмоқда. Бундан ташқари, у озиқ-овқат инқирози ва бошқа иқтисодий муаммоларнинг кучайишига ҳам сабаб бўлган.
БМТнинг хабар қилишича, халқаро ҳамжамиятнинг асосий мақсади ҳамон исишни саноатлашишдан олдинги давр (1850-1900 йиллар) кўрсаткичларидан 1,5 даража цельсийдан оширмаслик бўлиб қолмоқда. 2024 йилда бу кўрсаткич 1,55 даражадан ошган. Бироқ ҳисоботга кўра бу глобал мақсадга эришиш ҳали ҳам имкон доирасида.
БМТ бош котиби таъкидлаганидек, бунга эришиш учун давлат раҳбарлари бир-бирига қадам ташлаши ва ўз ҳудудларида қайта тикланувчи энергия манбаларидан фойдаланишни биргаликда йўлга қўйишлари лозим.
Изоҳ (0)