Беларусь президенти Александр Лукашенко 30 июнь куни фуқароларга мурожаат қилиб, “мамлакатда уруш йўқлиги учун амалдаги ҳокимиятга дуо қилишлари ва миннатдор бўлишлари” кераклигини айтди.
Лукашенко мамлакатда “ҳарбий ҳолатга ўхшаш вазият” юзага келганини таъкидлади. У буни қишлоқ хўжалигидаги тобора чуқурлашаётган муаммолар билан изоҳлади. Беларусь президенти амалдорларни “ўз ерининг эгаси бўлишга” ва кадрлар ҳаракатини қатъий назорат қилишга чақирди.
Нега энди масалани бунчалик кескин қўйяпман? Мана, кўпчилик: “Крепостной ҳуқуқ, крепостной ҳуқуқ” деяпти. Қулоқ солинглар, йигитлар, ҳозирги вазият — ҳарбий ҳолатга ўхшаш. Биз урушга кирмаганимиз учун халқ бу ҳокимиятга дуо қилиши керак. Биз ҳануз ўзимизни бундан сақлаб турибмиз. Кўряпсизми, атрофимизда нима бўлаётганини — ичкарида муаммолар пайдо бўлиши биланоқ уларни кучайтиришади, бизга қўшимча муаммолар ташлашади, деди Беларусь президенти.
Шунингдек, у агар ҳудудлар раҳбарлари мутахассислар етишмаслиги ҳақида шикоят қилса, Минск уларга “икки-учта назоратчи” юбориши билан огоҳлантирди. Лукашенко агар ишчилар “ўз ихтиёри билан кетган, қочиб кетган” бўлса, “уларни ишга олганлар”га эътироз билдирилишини айтди.
Лукашенко кимдир ёки нимадир учун “дуо қилишга” илк бор ундаётгани йўқ. У 2023 йил август ойида чет элликлар Беларусь аҳолиси учун ибодат қилиши кераклигини айтган, чунки ҳукумат 2020 йилдаги минглаб норозилик намойишларини бостиришга эришганини таъкидлаган.
Шунинг учун мен чет элликларга доим айтаман: сиз беларуслар учун ибодат қилишингиз керак. Биз бу ерда туриб, сизларни учинчи жаҳон урушидан сақлаб қолдик, деган эди у.
2021 йилда эса Лукашенко BBC журналисти Стивен Розенберкка берган интервьюсида: “Сиз ҳали ҳам биз учун ибодат қилишингиз керак. Ибодат қилинг! Чунки биз фашизмга қарши уруш олиб борганмиз”, деган эди.
Беларусда қишлоқ хўжалигидаги муаммолар
Беларусда картошка ва баъзи сабзавотларнинг етишмаслиги каби муаммолар кузатилмоқда. Лукашенко мамлакатда картошка танқислиги кучайганини тан олган ва бунда маҳаллий фермерларни айблаганди. У фермерлар барча картошкани нархи қимматроқ бўлган Россияга сотиб юборганини айтган.
Февраль ойида Лукашенко ҳукуматга картошка нархининг ошиши билан боғлиқ муаммони ҳал қилишни топширган. Ундан олдинроқ эса озиқ-овқат захираларини шакллантиришни талаб қилган, бироқ ҳукумат бу топшириқларни бажара олмаган. Беларусь президенти май ойида аҳолига ҳам, Россияга ҳам етадиган даражада картошка етиштириш вазифасини қўйганди. Президент Беларусь “рус биродарлар”га ёрдам кўрсатиши лозимлигини айтган.
Май ойи охирида Лукашенко чорва моллари нобуд бўлиши кўламига ҳам эътибор қаратган эди. У бу антирекордга етганини билдирганди. Сиёсатчи тезкор чоралар кўришни талаб қилиб, ечим вариантларидан бирини таклиф қилган. Бу “самарасиз хўжаликлар”дан ҳайвонларни сотиб олиш ва уларни тегишли сақлаш шароитлари ҳамда ветеринария назоратини таъминлай оладиган хўжаликларга топширишни назарда тутади.
Изоҳ (0)