Вино ертўласи, турк ҳаммоми ва бошқалар: Лукашенко қароргоҳи бўйича суриштирув эълон қилинди (фото)

Александр Лукашенкога тегишли кўплаб қароргоҳлардан бири “Красноселское” ҳисобланади. У Минск шаҳридан 40 километр узоқликда, Удра дарёси бўйида жойлашган. БЕЛПОЛ ташкилоти ушбу қароргоҳ ҳудудида нима жойлашгани ва айрим харажатлар ҳақида маълумот берди.

1990 йилларда бу объект “Красноселское” давлат ўрмон хўжалиги муассасасига қарашли эди. Кейинчалик у Президент девонининг яна бир тузилмаси — “Дипсервис”га ўтказилди. 2012 йилда эса мажмуа россиялик олигарх Михаил Гуцериев билан алоқадор бўлган “СертусАвиа” хорижий қурилиш унитар корхонасига 100 йилга ижарага берилди.

БЕЛПОЛ маълумотларига кўра, мажмуа ҳудудида учта йирик бино бор. Уларнинг ичида энг каттаси — 1-рақамли уй бўлиб, унинг умумий майдони 730 квадрат метрни ташкил қилади.

Биринчи қаватда қишки боғ, овқатланиш зали, кутубхона, уй кинотеатри ва дам олиш хонаси жойлашган. Иккинчи қаватда эса бир нечта ҳаммом, гардероб, ётоқхоналар ва шахсий кабинет бор. Ушбу кабинетнинг майдони 78 квадрат метр бўлиб, бу кўплаб беларусликларнинг бутун квартираси ҳажмига тенг. Лукашенко ётоқхонасининг майдони эса 56,5 квадрат метрни ташкил этади.

Шунингдек, ертўлада анъанавий турк ҳаммоми, сауна, жакузи, тренажёр зали ва 84,6 квадрат метр майдонга эга бассейн жойлашган. Унинг ёнида вино ертўласига кириш жойи бор. Ушбу уйга махсус алоқа линияси ўтказилган. Бу айнан Лукашенконинг қароргоҳи ҳақида кетаётганини тасдиқлайди.

Маълумотларга кўра, 1-рақамли уйдаги карниз ва пардаларнинг нархи 560 минг Беларусь рубли (биринчи вариант бўйича) ёки 449 минг Беларусь рубли (иккинчи вариант бўйича) деб баҳоланмоқда. Бу АҚШ долларида 236 мингдан 287 минггача бўлган суммага тўғри келади.

2-рақамли уйнинг умумий майдони 453 квадрат метрни ташкил этади. Биринчи қаватда бир нечта ҳожатхона, овқатланиш зали, меҳмонхона ва шахсий кабинет жойлашган. Иккинчи қаватда эса бир нечта ётоқхона, гардероб хоналари, ҳаммомлар, шунингдек, террас ва қишки боғ мавжуд.

Ертўла қисмида кенг бассейн, сауна ва турк ҳаммоми жойлашган. Бундан ташқари, у ерда билярд ва тренажёр хоналари ҳам бор. Ушбу бино меҳмонлар учун ажратилган уй сифатида фойдаланилади.

3-рақамли уй ресторан ва хизматкорлар уйи сифатида фойдаланилади. Унда бош ошпаз хонаси, идиш-товоқ ювиш хонаси, овқатланиш зали, ошхона, бир нечта ётоқхона, билярд хонаси ва бошқа қулайликлар мавжуд. Фақатгина бар учун қаҳва тайёрлаш ускуналарига деярли 5 минг доллар сарфланган.

Таъкидланишича, бино шундай лойиҳалаштирилганки, хизматкорлар ўз вазифаларини бажараётганда Лукашенко ёки унинг ҳамроҳлари кўзига ташланмайди.

Шунингдек, 100 минг доллар сарфланган вертолёт майдончаси ҳам бор. Турар жой биноларидан ташқари, бу ерда бассейнли СПА-марказ, ов учун махсус уй ҳамда гаражлар жойлашган.