Беларусда расман еттинчи муддатга президентликка киришган Александр Лукашенко “дунёнинг ярми унинг диктатурасини орзу қилиши”ни айтди. Бу ҳақда у 25 март куни президентлик қасамёдини қабул қилиш вақтида маълум қилди.
Маросимда Лукашенко уни “Европанинг сўнгги диктатори” деб атаётганлар устидан кулиб, Беларусда демократия “ўзини унинг эталони деб атайдиганлардан кўра кўпроқ эканини” айтди.
Дунёнинг ярми бизнинг диктатурамизни, яъни амалий ишлар ва халқимиз манфаатларига хизмат қилувчи диктатурани орзу қилади, деди у инаугурация нутқида.
Лукашенко мамлакатда “сўз эркинлиги масаласида ҳам ҳамма нарса жойида” эканини таъкидлади. У ҳар бир киши конституциявий ҳуқуққа ва ўз фикрини билдириш имкониятига эга экани, “бироқ беларусларнинг авлодлари томонидан яратилган нарсани йўқ қилишга ундаш керак эмас”лигини қайд этди.
Биз сўз эркинлигидан ўз мамлакатимизни вайрон қилиш воситаси сифатида фойдаланишга йўл қўймаймиз, деди Беларусь раҳбари.
2024 йил ноябрь ойида Лукашенко мамлакатда “ҳақиқатан ҳам диктатура мавжуд”лигини айтган эди. Аммо бу “барқарорлик, хавфсизлик, тартиб, меҳрибонлик ва меҳмондўстлик диктатураси” эканини қайд этган. Президент бунга “адолат диктатураси” деб ном берган.
25 март куни Лукашенко еттинчи марта президентлик лавозимига қасамёд қилди. Инаугурация маросими Мустақиллик саройининг тантанали маросимлар залида ўтказилди.
Изоҳ (0)