Исроилнинг Украинадаги элчиси Михаил Бродский нима учун ўз мамлакати ҳукумати Киевга қурол етказиб беришга рози бўлмаслигини тушунтирди, деб ёзади УНИАН.
Қисқача айтганда, ҳаммаси оддий: ҳеч бир Исроил ҳукумати вакили Россия билан муносабатларда «қизил чизиқлар»дан ташқарига чиқиш, Украинага қурол етказиб беришга розилик бериш масъулиятини ўз зиммасига олмайди, чунки вазият кескинлашган тақдирда ҳеч ким Исроилни ҳимоя қилмайди.
«Биз НАТО аъзоси эмасмиз. Украинага энг кўп ҳарбий ёрдам кўрсатаётган давлатлар НАТОга аъзо бўлган давлатлардир ва улар НАТО ҳимояси остида. Исроил қўшни давлатларнинг тажовузкорлигига бир ўзи қаршилик кўрсатади. Террорга қарши ҳам бир ўзи курашади. Исроил Яқин Шарқда бўлиб ўтган урушларнинг барчасида якка ўзи ғалаба қозонди», — деди Исроилнинг Украинадаги элчиси Михаэль Бродский.
Унинг сўзларига кўра, «бугунги кунда Яқин Шарқ унчалик ҳам тинч минтақа эмас». Исроил ва унинг аҳолиси учун хавф сақланиб қолмоқда.
«Шунинг учун Исроил ўз мамлакатидаги хавфсизлик вазиятининг ёмонлашишига олиб келиши мумкин бўлган ва келажакда урушга, тинч аҳолининг ва исроиллик аскарларнинг ўлимига олиб келиши мумкин бўлган қизил чизиқлардан чиқмасдан ҳаракат қилмоқда. Бирорта ҳам Исроил ҳукумати вакили бунга рози бўлмайди», — дейди Бродский.
«Россия бир неча йиллардан бери минтақамизда муҳим рол ўйнамоқда, айниқса, 2015 йилдаги Сурия билан чегараларимизда Россия контингенти пайдо бўлганидан бери. Исроил Яқин Шарқ сиёсатида бу омилни ҳисобга олиши керак», — дея қўшимча қилди у.
Аввалроқ Исроил Украинага қурол бермаслиги, аммо ракета ҳужумидан огоҳлантириш тизимида ёрдам беришга тайёр эканлиги ҳақида хабар берилган эди.
Мавзуга доир:
Изоҳ (0)