Колумбияда 10 июнь куни мамлакатнинг жануби-ғарбий қисмида портлашлар тўлқини содир бўлди. Бу ҳақда CNN хабар берди.
Расмийларнинг айтишича, мамлакат полициясига қарши уюштирилган деб тахмин қилинган ҳужумда камида 7 киши ҳалок бўлган. Колумбия миллий армияси портлашлар Кали шаҳри ҳамда Каука ва Вале-дел-Каука департаментларидаги бир нечта шаҳарларда содир бўлганини маълум қилган.
Колумбия миллий полицияси кун давомида 20 дан ортиқ “террорчилик ҳужумлари”, жумладан, автомобилларда портлашлар, ўқотар қуроллар билан ҳужумлар ва портловчи қурилмаларнинг ишга туширилиши ҳақида хабар берган. Ҳалок бўлганлар орасида камида 2 нафар офицер, яраланган 28 киши орасида эса тинч аҳоли вакиллари, ҳарбийлар ва полиция ҳам борлиги айтилган.
Армиянинг таъкидлашича, ҳужумларни жангарилар фракцияларидан бири бўлган Estado Мayor Central партизан гуруҳи раҳбари уюштирган. Аммо исбот ва далиллар тақдим этилмаган. Олдинроқ мамлакатда FARC исёнчилари Колумбия ҳукумати билан тинчлик шартномасини имзолаган эди.
Estado Мayor Central ҳужум учун жавобгарликни ўз зиммасига олмаган. 10 июнь кунги баёнотида гуруҳ Колумбия ҳукуматини тинчликдан воз кечишда айблаган ва тинч аҳолига ўзаро отишмалардан қочиш бўйича маслаҳат берганди.
Колумбиянинг учинчи йирик шаҳри ҳисобланган Калида шаҳар мэри Алехандро Эдер 10 июнь куни 3 та портловчи қурилма ишга туширилганини айтган. Ҳарбийлар 6 та ҳужумнинг олдини олиб, портловчи модда тайёрлаётган 2 кишини қўлга олган.
Эдерга кўра, портлашлар Калининг Лос Мангос ҳудудида, Мелендез полиция бўлими яқинида, яна бири эса Мануэла Бельтран тезкор марказида қайд этилган. Вазият энди назорат остидалиги билдирилган. Хавфсизлик кучларини бутун шаҳар бўйлаб жойлаштириш буюрилган.
“Улар бизни 1989 йилга қайтаришмоқчи. Биз бунга йўл қўймаймиз!”, деди Эдер Колумбиядаги шиддатли зўравонлик, жумладан, президентликка номзод Луис Карлос Галаннинг ўлдирилиши даврига ишора қилиб.
Изоҳ (0)