Колумбия президенти Густаво Петро 20 миллиард долларга баҳоланган хазинани ўз ичига олган кемани “имкон қадар тезроқ” денгиз тубидан чиқаришни буюрди. Бу ҳақда The New York Post хабар берди.
“Сан-Хосе” номли Испания галеони 1708 йил июнь ойида инглиз кемаси билан жанг пайтида чўкиб кетган. Ҳозирда кема Кариб денгизининг тубида жойлашган. Бортда олтин, кумуш ва зумрад билан тўлдирилган сандиқлар бўлган. Мутахассисларнинг фикрича, хазинанинг қиймати 4 миллиард доллардан 20 миллиард долларгача баҳоланмоқда.
Петронинг шошилинч қарори сиёсатчининг президентлик муддати 2026 йилда тугаши билан боғлиқ. Лойиҳани амалга ошириш учун у давлат-хусусий шерикликни йўлга қўйишни сўраган.
Хазинага Американинг Sea Search Armada компанияси ҳам даъвогарлик қилмоқда. Чунки у 1981 йилда кема қолдиқларини биринчи бўлиб аниқлаган. Суд орқали у Колумбия расмийларидан 10 миллиард доллар — хазинанинг тахминий қийматининг ярмини талаб қилмоқда.
Бортида 600 киши бўлган “Сан-Хосе” кемаси 1708 йил 8 июнда чўкиб кетган. Ўша куни кема инглиз эскадрони билан жангда қатнашган. Кемалар ўртасида бир ярим соат давом этган жанг оқибатида “Сан-Хосе” бортида порох захираларидан аланга чиққан.
Асрлар давомида чўкиб кетган “Сан-Хосе” Кариб денгизи тубида қайтариб бўлмайдиган даражада йўқолган деб ҳисобланган. 2015 йилда Колумбиянинг собиқ президенти Хуан Мануэл Сантос мамлакат ҳарбий-денгиз кучлари Колумбия ҳудудий сувлари тубида тахминан 700 метр чуқурликда чўкиб кетган кемани аниқлаганини айтган.
Изоҳ (0)