2025 йилда Андижон вилояти экспорти ҳажмини 1,5 миллиард долларга етказиш кўзда тутилган. I ярим йилликда режанинг учдан бир қисми ҳам бажарилмаган. Бу ҳақда 28 июль куни президент Шавкат Мирзиёевга ҳудудда амалга оширилган ишлар ва янги режалар бўйича берилган ахборотда маълум қилинган.
Президент матбуот хизмати йиғилишда қатор масалалар кўтарилганини очиқлади. Қайд этилишича, жорий йилда мутасаддиларга Андижон вилоятига 3,1 миллиард доллар инвестиция олиб келиш, товар ва хизматлар экспорти ҳажмини 1,5 миллиард долларга етказиш вазифаси қўйилган. Шу билан бирга, 305 минг фуқаро бандлигини таъминлаб, 32 мингдан зиёд оилани камбағалликдан чиқариш кўзда тутилган.
“Вилоятда йил бошидан буён 1 миллиард долларлик янги қувватлар, 344 та савдо ва сервис мажмуаси ишга тушган. Яна 2,5 миллиард долларлик лойиҳалар бошланган”, дейилади хабарда.
Манбанинг маълум қилинишича, январь июнь ойларида вилоят экспорти ҳажми 465 миллион доллар бўлган. Яъни ярим йиллик экспорт олдинга қўйилган 1,5 миллиард долларлик режанинг учдан бир қисмига ҳам етмаган.
Олти ой давомида ҳудудга 850 миллион доллар инвестиция жалб этилган. Мазкур кўрсаткич ҳам умумий режанинг учдан бир қисмига етмайди.
Манбага кўра, ҳудудда 40 миллион доллар сармоя эвазига Германия, Туркия ва Япониядан робот-технология олиб келиб, инновацион клиника барпо этилади. Элчилар ёрдами билан агрокластер ташкил қилишга Италиядан 20 миллион евро, замонавий агрологистика мажмуаси қуришга Германиядан 25 миллион евро жалб этилиши кутилмоқда. Хонобод шаҳри, Хўжаобод ва Булоқбошида туристик масканлар ташкил қилиш бўйича 30 дан зиёд ташаббуслар билдирилган.
“Умуман айтганда, 1 миллиард 100 миллион долларлик қўшимча лойиҳалар шакллантирилган. Уларнинг натижасида 22 минг иш ўрни, қўшимча 200 миллион долларлик экспорт имконияти очилади”, дея қайд этган президент матбуот хизмати.
Давлат раҳбари вилоятдаги ҳар бир шаҳар ва туманга алоҳида ёндашиб, янгича ишлаш, янги лойиҳаларни инвестицияси кам ҳудудларга жойлаштириш зарурлигини таъкидлаган. Ишсиз ва эҳтиёжманд оилаларни ўқитиб, ишга жойлаштириш, маҳаллаларни жиноятчиликдан холи ҳудудга айлантириш бўйича кўрсатмалар берилган.
Маълумот учун, Андижон вилояти экспорти ҳажми 2022 йилда 1 миллиард 246 миллион долларни ташкил этган. 2023 йилда бу кўрсаткич 82 миллион доллар камроқ, яъни 1 миллиард 164 миллион доллар бўлди. 2024 йилда эса 1 миллиард 191 миллион долларлик товар ва хизматлар экспорти амалга оширилди. Жорий йилда вилоят масъулларига экспорт ҳажмини шундан 309 миллион долларга кўпайтириш вазифаси юклатилган.
Изоҳ (0)