АҚШ президенти Дональд Трамп Украинадаги можарони ҳал этиш муддатлари бузилганда қандай чоралар кўрилиши ҳақида маълумот бермаяпти. Келишувга эришиш учун белгиланган вақт бўйича Америка позицияси қатъийлаштирилганига қарамай, уни эътиборсиз қолдириш оқибатлари масаласи ҳали ҳам очиқ қолмоқда. Бу ҳақда Британиянинг The Guardian газетаси ёзмоқда.
“Ҳамон жавобсиз қолаётган асосий савол шуки: Трамп белгиланган муддат тугаши билан аслида нима қилади”, деб ёзади газета мухбири Якуб Крупа.
АҚШ президенти Дональд Трамп Россия ва Украина ўртасида тинчлик келишувига эришиш учун аввал белгиланган 50 кунлик муддатни қисқартиришга қарор қилганини маълум қилди.
“Мен белгилаган 50 кунлик муддатни қисқартираман, чунки нима бўлишини аллақачон биламан”, деди Трамп Шотландияга ташрифи чоғида.
Шу билан бирга, Америка раҳбари Россия раҳбариятининг Украинага нисбатан сиёсатидан мамнун эмаслигини билдирган.
“Россия президенти Владимир Путиндан кўнглим қолди. Кўрамиз, нима бўлар экан. Мен жуда хафа бўлдим. Бу вазиятни ҳал қилишимиз керак бўлади”, деди АҚШ раҳбари.
“Бугундан бошлаб тахминан 10 ёки 12 кунлик янги муддат белгиламоқчиман. Кутиш учун ҳеч қандай сабаб йўқ... биз ҳеч қандай ривожланишни кўрмаяпмиз”, деди у.
Июль ойи бошида Трамп агар Украинадаги урушни тўхтатиш бўйича 50 кун ичида келишувга эришилмаса, Россияга нисбатан тахминан 100 фоизлик қаттиқ божлар жорий этиш билан таҳдид қилган эди.
Изоҳ (0)