Ҳиндистонда бир ёшли бола қўлига чирмашган кобрани тишлаб олди. Бу ҳақда Independent хабар бермоқда.
Маълум бўлишича, воқеа бола уйда ўйин ўйнаб ўтирганида содир бўлган. Илон тўсатдан пайдо бўлиб, гўдакнинг қўлига чирмашиб олганида оила аъзолари ёрдамга шошилган. Аммо боланинг ўзи кобрани тишлаб олган. Натижада илон ҳалок бўлган. Бироқ бола ҳам кобра чаққанидан кейин кўп ўтмай ҳушидан кетган. У зудлик билан бирламчи тиббий ёрдам марказига, сўнгра Беттиадаги Давлат тиббиёт коллежи касалхонасига етказилган.
Таъкидланишича, шифокорлар кобра заҳри кучсиз таъсир кўрсатганини ва ўз вақтида даволаниш оғир оқибатларнинг олдини олишга ёрдам берганини айтган.
“Ўз вақтида кўрсатилган тиббий ёрдам боланинг ҳаётини сақлаб қолди. Ҳозирда унинг аҳволи барқарор, даволаниш шифокорлар назорати остида олиб борилмоқда. Тиббиёт бригадаси болага тиббий ёрдам кўрсатиб, доимий равишда дори-дармонлар билан таъминламоқда ва у кузатув остида”, деди шифокор Саураб Кумар.
Ҳиндистонда 300 га яқин илон тури мавжуд бўлиб, уларнинг 60 таси жуда заҳарли ҳисобланади, масалан, Рассел илонлари, крайтлар ва тангачали эфалар. Бу илонлар чақиши аксарият ҳолатларда ўлимга сабаб бўлади. Ҳиндистон кобраси Ҳиндистонда энг кўп илон хавфли турларнинг “катта тўртлиги” рўйхати киради.
2020 йилда eLife журналида чоп этилган тадқиқотга кўра, 2000 йилдан 2019 йилгача бўлган 20 йил ичида мамлакатда илон чақишидан миллиондан ортиқ ўлим қайд этилган.
Изоҳ (0)