“Дарё”да “‘Ҳоким уйингни экскаватор билан бузиб ташлайман деб пўписа қиляпти’, — Самарқандда уйи ‘снос’га тушганларга компенсация тўлаб берилмади”, сарлавҳали мақола эълон қилинганди. Унда вилоятнинг Пайариқ туманидаги Имом Бухорий зиёратгоҳи ободонлаштирилиши, ҳудудда шаҳарча барпо этилаётгани учун 53 та уй “снос”га тушгани, шундан 15 та хонадон учун компенсация пули ҳалигача тўлаб берилмагани ҳикоя қилинганди.
Мурожаатчиларнинг таҳририятга билдиришича, ушбу мақоладан сўнг, аҳолининг компенсация пули тўлаб берилган.
“Дарё”га раҳмат, бир неча ойдан бери сарсон бўлиб юргандик. Мақола чиққач, ҳокимлик пулимизни тўлаб берди, дейди мурожаатчилар.
Самарқанд вилояти ҳокими маслаҳатчиси, Имом Бухорий шаҳарчаси қурилишига бош-қош бўлаётган Алишер Раимжоновнинг “Дарё”га билдиришича, шаҳарча барпо этилиши муносабати билан 53 та уй “снос”га тушган.
Имом Бухорий шаҳарчаси 2025 йилнинг август ойига қадар қуриб битказилиши режа қилинган. Бу шаҳарчага келажакда ҳар йили 30 миллион нафар хорижлик сайёҳ келиши режалаштирилган. 5 та қишлоқда канализация ўрнатилди, сув иншоотлари барпо этилди. Ер остидан электр энергия тортилди. 16 миллионта дарахт кўчатлари экилди, деганди ҳоким маслаҳатчиси.
Шу қишлоқдаги яшовчи бошқа мурожаатчиларнинг маълум қилишича, компенсация билан боғлиқ муаммо ҳамон бор.
Бизнинг ҳам уйимиз учун тўланиши керак бўлган компенсация пуллари тўлаб берилмаган. Ҳозирча фақат интернетга чиққан фуқароларнинг пули тўлаб берилди. Бизларга қачон навбат келади, билмаймиз, дейди таҳририятга мурожаат қилган яна бир мурожаатчи.
“Дарё” компенсация пулини ололмаётганлар мавзусига яна қайтади.
Изоҳ (0)