«Дарё» нашрида «Қашқадарёда яна ‘снос’ муаммоси: Уйи ва дорихонаси бузиб ташланган тадбиркор 4 йилдан бери ҳақини ололмай сарсон бўлмоқда» сарлавҳали мақола чоп этилганди. Ушбу мақолага Қарши шаҳар ҳокимлиги муносабат билдирди.
Қарши шаҳар ҳокимлиги ахборот хизматининг маълум қилишича, мақолада кўтарилган масала ҳокимлик томонидан ўрганиб чиқилган ва тадбиркорнинг дорихонаси учун берилган ертўлага кириб-чиқиш эшиги ўрнатилган.
«Ҳақиқатан ҳам 2015 йилда фуқаро Нуриллаев Ғанишерга тегишли бўлган, Қарши шаҳри I.Каримов кўчасидаги 13-уй 6-хона ‘Ҳамраев Эркин таъмир бинокор сервис’ хусусий корхонаси томонидан бузиб олинган. Бу иш биринчи президентнинг 2013 йил 25 июлдаги қарори билан тасдиқланган дастур асосида амалга оширилган, — дейилади ҳокимлик ахборот хизматининг муносабатида. — Мулкни бузиб олиш ва етказилган зарарни қоплаш масаласи 2015 йил 13 августдаги 15-сонли шартнома билан мустаҳкамланган. Мазкур ҳужжатда қайд этилишича, тарафлар бузилишга тушган турар жой эвазига шу ернинг ўрнида қуриладиган янги кўп қаватли уйнинг 1-қаватидан умумий майдони 50 квадрат метр бўлган нотурар жой ертўласи (майдони 50 квадрат метр) билан хусусий мулк қилиб берилишига келишишган. Бунинг учун қўшимча тўлов назарда тутилмаган. Тадбиркорлик субъекти бу ҳақда фуқарога кафолат хати ҳам тақдим этган. 2016 йилнинг тўртинчи чораги объектни Давлат комиссиясига тўлиқ топширишнинг охирги муддати этиб белгиланган».
Қарши шаҳар ҳокимлиги тадбиркор учун берилаётган нотурар жой ҳали-бери тадбиркор номига ўтказилмаслигини ёзмоқда. Уларнинг айтишича, қурувчи кредит олиш учун мазкур кўп қаватли уйни гаровга қўйган.
«Ҳамраев Эркин таъмир бинокор сервис» хусусий корхонаси раҳбарияти тақдим этган маълумотга кўра, «Мустақиллик» маҳалласи I.Каримов кўчасидаги бузилган уйлар ўрнида тушган янги қўп қаватли уй қурилиши тижорат банки кредити ҳисобига молиялаштирилган. Мавжуд тартибга кўра, қурилиш ташкилоти банк олдидаги қарзни тўлиқ қопламагунча банк мулкни гаровда ушлаб туриши, уни фуқароларга расмийлаштириб бўлмаслиги билдирилган.
Демак, уйи ва дорихонаси бузилган тадбиркор янги бино қурилишини 4 йил кутгани етмаганидек, энди «қурувчи кредитини қачон ёпадию, қачон ҳужжатларни расмийлаштираман» деб ҳам яна бир неча йил кутадими? Тадбиркорнинг манфаати энг охирги ўриндами?
Маълум қилишларича, Қарши шаҳар ҳокимлиги тадбиркорга берилиши кўзда тутилган нотурар жойни ҳам бориб кўрган.
«Қўп қаватли уйнинг биринчи қаватидан ажратилган хона аслида 53 квадрат метр, ертўласи эса 100 квадрат метр экани тегишли кадастр ҳужжати ва ўтказилган ўлчов ишлари чоғида ўз тасдиғини топди, — дейилади ҳокимлик муносабатида. — Яъниким, қурилиш ташкилоти шартномада белгиланганидан кўра ортиқчаси билан нотурар жой таклиф этган. Ишчи гуруҳи ўрганиши давомида қурилиш ташкилоти ва фуқаро ўртасидаги асосий тушунмовчилик ертўлага қўшимча кириб-чиқиш имконини берувчи йўлак билан боғлиқ экани ойдинлашди. Фуқаро йўлак очиб беришни талаб қилган жой бугунги кунда бошқа бир тадбиркорга тегишли. Албатта, қурувчи ушбу қўп қаватли уйни тижорат мақсадини кўзлаб, сотиб даромад олиш учун бунёд этган. Бу борада уни айблаш ноўрин. Қонунга зид хатти-ҳаракат, фуқаро Ғ.Нуриллаев ҳуқуқини бузувчи ҳолат қайд этилмади».
Ҳокимликнинг «Албатта, қурувчи ушбу қўп қаватли уйни тижорат мақсадини кўзлаб, сотиб даромад олиш учун бунёд этган», деган гапига тамоман қўшилган ҳолда, ҳокимликка бир савол билан юзланамиз. Қурувчи тадбиркор йўлак дея атаётган хонани аввалдан бошқа тадбиркорга сотишни мақсад қилган бўлса, унда нега тадбиркорга мўлжалланган хонадан ўша йўлакка чиқувчи эшик ўрнатади? Қани бу ерда мантиқ?
Ҳокимлик ахборот хизматидан маълум қилишларича, тадбиркорнинг ертўласига кўп қаватли уйнинг орқа томонидан кириш эшиги очиб берилган. Тадбиркор Ғ.Нуриллаев эса бошқа эътирози йўқлигини маълум қилган.
Ҳокимлик тадбиркорнинг бошқа эътирози йўқ деяптию, буни асословчи бирор бир ҳужжат кўрсатмаяпти. Шу боисдан ҳам тадбиркор Ғанишер Нуриллаев билан боғландик.
— Дорихонам ертўласига кириб-чиқиш учун алоҳида йўлак очиб берамиз дейишганди, — дейди Ғанишер Нуриллаев. — «Мулкка эгалик ҳуқуқини тасдиқловчи ҳужжатларини ҳам тақдим этамиз» дейишганди, аммо ҳалигача жимлик. Шунчаки эшик очиб қўйиш билан иш битмайди.
Тадбиркорнинг айтишича, муаммога етарли даражада эътибор қаратилмаётганлиги боис, у масъуллар билан учрашиш ниятида Тошкентга кетган.
Қарши шаҳар ҳокимлиги ахборот хизмати муаммога ечим топилганлигини ёзиш баробарида, таҳририят журналистини масалага нохолис ёндашувда айблайди.
Унда шундай дейилади: «Аввало мақола сарлавҳасида бўрттириш борлигини қайд этмай иложимиз йўқ. Шу йўсинда мавзуни кучайтиришга, ваҳима уйғотишга уринилгани кўриниб турибди. Сарлавҳада урғу берилгани каби аслида масала ‘сносъга тааллуқли эмас. Негаки гап уй-жойни бузиб олиш ҳақида кетмаяпти. Аввал бошдан бу борада муаммо бўлмаган, акс ҳолда қурувчи ва фуқаро зарарни қоплаш ҳақида ўзаро шартнома имзоламаган, келишувга бормаган бўларди. Ҳаммаси ана шу шартнома шартларининг қай даражада бажарилганига тақалган. Биргина йўлак очилиши билан муаммо барҳам топгани ҳам фикримизни исботлайди».
Қизиқ, ҳокимлик ахборот хизмати муносабати аввалида тадбиркорнинг уйи ҳамда дорихонаси 2015 йил қурилиш ташкилоти томонидан бузиб ташланганлигини ёзяпти. Кейин эса гапидан қайтиб, «Негаки гап уй-жойни бузиб олиш ҳақида кетмаяпти» деяпти. Ахборот хизмати ўзи ёзган муносабатни ўзи ўқидимикан?
Ҳокимлик ахборот хизмати журналистни айблашда давом этади ва «Тадбиркор 4 йилдан бери ҳақини ололмаяпти, дейилмоқда. Бу ҳам журналистнинг вазиятни холис туриб ўрганмагани, сабаби билан қизиқмагани, объектив омилларни эътиборга олмагани билан боғлиқ», дейди.
Оддий арифметика: Уй ва дорихона 2015 йил бузилган. Ҳозир 2019 йилда яшаяпмиз. Шу пайтга қадар тадбиркорга нотурар жой берилмаган. Демак, орадан тўрт йил ўтган бўладими?
— Мақолада яна бир жиҳат эътибордан четдан қолдирилган, — дейилади ҳокимлик ахборот хизматининг муносабатида. — Қурувчи бузилган уй-жой эвазига фуқаро Ғ.Нуриллаевга шартномада кўрсатилганидан ортиқчаси билан жой таклиф қилган. Биринчи қаватда жойлашган нотурар жойнинг майдони 53 квадрат метрни, ертўланинг майдони эса 100 квадрат метрни ташкил этади. Ваҳоланки, ўзаро келишувга кўра, бу рақам мос равишда 50 квадрат метрдан кам бўлмаслиги кераклиги айтиб ўтилган.
Ҳокимлик ахборот хизмати масъуллари оғиз кўпиртириб, «тадбиркорга 53 кв/метр нотурар жой ва 100 кв/метр ертўла берилди», деяпти. Лекин буни асословчи бирор бир ҳужжат кўрсатишга ожиз. Демак, тадбиркорнинг чирқирашида жон бор.
Ҳокимлик ахборот хизмати мухбирнинг мақолада шаҳар ҳокимини тилга олишини «журналистнинг айбдорларни кўпайтиришга уриниши», дея баҳолайди.
«... мақолада муаллиф айбдорларни кўпайтиришга, текшириб кўрмагани ҳолда мутасаддиларни асоссиз равишда ёмонотлиқ қилишга урингани сезилади. Муаммо фақат икки киши ўртасида, рози-ризолик билан ҳал қилиниши керак бўлса-да, мақолада Қарши шаҳар ҳокимлиги ҳам тилга олинади».
Қарши шаҳар ҳокимлиги ахборот хизмати масъуллари «снос» масаласи ҳоким аралашувисиз битмаслигини яхши билашади, албатта. Шундай бўлса-да, мақолада ҳоким тилга олинганини «хато» дея баҳолашмоқда. Бундан хулоса қилиш мумкинки, тадбиркор ҳоким қабулига борганда «бу масалага ҳоким аралашмайди», деб мурожаатчини изига қайтаришган кўринади. Йўқса, тадбиркор ОАВ га мурожаат қилиб, адолат изламасди.
Ҳокимлик мақолада тилга олинган бошқа масала ҳақида ҳеч қандай маълумот бермаган. Аҳоли хонадонларидаги иситиш масаласига эътибор қаратмаган. Демак, бу масала билан умуман қизиқмаган кўринади. Аҳолининг «Дарё» мухбирига такрорий мурожаат қилишича, қурувчи «отопление»ни бир ҳафтада ўрнатиб беришни ваъда қилган бўлса-да, ваъдасида турмаган. Аҳоли муаммоси ҳалигача ечилмаган.
Изоҳ (0)