Ўзбекистон Конституцияга киритилаётган ўзгартиришлар лойиҳаси оммавий муҳокамага қўйилганидан хабарингиз бор. Бу ҳақда ҳатто Президент Шавкат Мирзиёев ҳам бот-бот гапирган. Айнан «снос» масаласига тўхталган президент «Халқимиз орасида ‘снос’ деган ном билан машҳур бўлган муаммо бор. Бундай ҳолатга бутунлай барҳам бериш учун уй-жой бўйича конституциявий кафолатни белгилаб қўйиш лозим. Яъни, суднинг қарорисиз ҳеч ким уй-жойидан маҳрум қилинмаслиги керак. Иморат бузилишга тушадиган бўлса, бунинг учун бузишдан олдин унинг қийматига мос равишда компенсация тўланиши шарт. Уй-жойга ёки шахснинг бошқа мол-мулкига унинг рухсатисиз кириш, уларни кўздан кечириш ва тинтув ўтказишга фақат қонунда белгиланган ҳолат ва тартибда йўл қўйилиши Конституцияда қатъий белгиланиши даркор», деганди.
«Дарё» мухбири Конституцияга «снос» масаласида киритилаётган ўзгариш бўйича ундан жабр кўрган ва ўша ҳолат бир умр хотирасида муҳрланган яккабоғликлар билан суҳбатлашди.
«Қани энди шу ўзгариш 2019 йилнинг июль ойидан аввал бўлгани-да, шахсан мен, отам ва онам — оиламиз ‘снос’ деган балодан жабрланмаган бўлардик. Ўша мудҳиш воқеа — дадамнинг аччиқ устида ҳоким ўринбосари устига бензин сепиб, ёқиб юбориш воқеаси юз бермасди. Бизга ўхшаган минглаб инсонларнинг уй-жойи, савдо дўкони бузилмас эди. Миллионлар зарар кўрмас эди», — дейди Яккабоғ тумани ҳокимининг собиқ ўринбосари устига бензин сепиб ёқиб юборган тадбиркор Баҳриддин Исомовнинг ўғли Шарофиддин Даминов.
Шарофиддин Даминов 2019 йилнинг июль ойидаги «снос» бир умр хотирасида муҳрланганини айтмоқда.
«Ўша ёз ва ўша кун бир умр хотирамда муҳрланиб қолган. Ўша воқеа сабаб дадам жавобгарликка тортилди. Хонадонимиз, оила аъзоларим жабр кўрди. Хуллас, снос деган бало сабаб бошимизга кўп жабр-у ситамлар ёғилди. Тўғри, ўтиб кетди, аммо бир умр ёдимизда қолди», — дейди Шарофиддин Даминов.
Суҳбатдош «снос» воқеаларини эътиборга олиб, айнан шу масала фақат суд қарори билан амалга оширилиши тарафдори бўлаётган ташаббускорларга раҳмат айтмоқда.
«Бу ташаббус айнан халқнинг, менга ўхшаган жабрдийдаларнинг дарди. Буни инобатга олган ташаббускорлар ва шуни қўллаб-қувватлаётганларга раҳмат. Шу ўзгариш амалиётга татбиқ этилиб, мен ва менга ўхшаганлар снос сабаб жабрдийда бўлиб қолмайлик», — дейди Шарофиддин Даминов.
Эслатиб ўтамиз, 2019 йилнинг 20 июль куни Яккабоғ тумани ҳокими ўринбосари Мансур Тўймаев тадбиркор Баҳриддин Исомовга тегишли бинони экскаватор рулига ўтириб, ўзи бузмоқчи бўлганида, тадбиркор унинг устига бензин сепиб, ёқиб юборган эди.
Мавзуга доир:
Изоҳ (0)