Шавкат Мирзиёев раислигида 4 август куни мамлакат ҳаёти учун ғоят муҳим масала — давлат хизматини ислоҳ қилиш бўйича видеоселектор йиғилиши бошлангани хабар қилинганди. Унда давлат раҳбари ҳар бир вазирлик ва ҳокимлик кадрлар танлашни олийгоҳлардан бошлаши зарурлигини қайд этди.
Таъкидланишича, йил якунигача:
- барча вакант лавозимлар очиқ ягона электрон платформага жойлаштирилади;
- бўш лавозимга танловда иштирок этиш учун ҳозирги кунда талаб этилаётган 16 та ҳужжат сўралмайди, барча жараёнлар электрон шаклга ўтказилади;
- очиқ танлов орқали номзоднинг билими, тажрибаси ва салоҳияти аниқланади.
Бунинг учун икки ой муддатда олийгоҳлар дипломлари ва меҳнат дафтарчаларини мавжуд электрон базага тўлиқ киритиб, уни Танлов электрон платформасига интеграция қилиш вазифаси қўйилди. Йил якунига қадар 4 мингта бўш лавозимга танлов ўтказиш топширилди.
«Ҳар бир вазирлик ва ҳокимлик кадрлар танлашни олийгоҳлардан бошлаши зарур. Бу тажрибани тизимли йўлга қўйиш учун ҳар бир вазир ва вилоят ҳокими бир ой муддатда Ёш мутахассисларни танлаш дастурини эълон қилади.
Дастур доирасида олийгоҳларнинг битирувчи курсларида ўқиётган қобилиятли ёшлар сараланиб, вазирлик ва ҳокимлик тизимида стажировка ўтайди ва ўқишни тамомлагач, танлов асосида ишга қабул қилинади. Бунда, нафақат ўзимиздаги олийгоҳ талабалари, балки нуфузли хорижий олийгоҳларда ўқиётган ёшларимиз ҳам қамраб олинади», — деди президент.
Изоҳ (0)