Smart Swim “ақлли” сузиш кўзойнакларининг илк модели ишлаб чиқилганидан деярли олти йил ўтиб, Form компанияси унинг иккинчи авлодини тақдим этди. Янгиланган Smart Swim 2 бир қатор замонавий имкониятларга эга бўлиб, у аввалги версиянинг асосий функцияларини ҳам сақлаб қолган.
Ушбу кўзойнаклар линзаларидан бири 72 х 40 пиксел ўлчамдаги кенгайтирилган реаллик дисплейи билан жиҳозланган. Дисплей машғулот вақтида сузувчининг ҳаракатларига қараб автоматик тарзда мослашади, бу жараёнда акселерометр маълумотларидан фойдаланилади. Экранда сузиш тезлиги, йўналиши, босиб ўтилган масофа ва бошқа муҳим кўрсаткичлар акс этади.
Шунингдек, кўзойнакнинг чакка қисмига ўрнатилган махсус сенсор юрак уриш тезлигини ўлчайди. Барча кўрсаткичлар Форм иловаси орқали таҳлил қилинади ва фойдаланувчига машғулот самарадорлигини баҳолаш, натижаларни яхшилаш бўйича ёрдам беради. Қўшимча маълумот олиш учун Smart Swim 2 ни Apple Watch ёки Garmin “ақлли” соатларига улаш мумкин.
Янги моделнинг энг диққатга сазовор функцияларидан бири бу — SwimStraight деб номланган рақамли компасдир. У қисқа вақт ичида созланади ва сузиш вақтида фойдаланувчига тўғри йўналишда ҳаракатланишга ёрдам беради. Бироқ ушбу функциядан фойдаланиш учун ойлик 10 долларлик обуна талаб этилади. Обуна ёрдамида фойдаланувчилар 1 500 дан ортиқ мураббийлар бошчилигидаги тайёр машғулотларга ҳам эга бўлишади.
Form Smart Swim 2 кўзойнакларининг нархи 279 долларни ташкил этади. Бундан ташқари, унинг Gorilla Glass 3 линзалари билан жиҳозланган Prо версияси ҳам мавжуд бўлиб, у 329 доллардан бошланади.
Изоҳ (0)