Xiaomi компанияси Mix Flip 2 буклама смартфони ва Smart Band 10 фитнес билагузугини тақдим этди, шунингдек, кутилмаган AI Glasses ақлли кўзойнаклари тақдимоти билан ҳайратда қолдирди. Улар тиббий линзаларни ўрнатишни қўллаб-қувватлайди, бу эса уларни нафақат гаджет, балки кўришни яхшлишнинг тўлақонли воситасига айлантиради.
Қурилмага 12 мегапикселли Sony IMX681 камераси ўрнатилган бўлиб, у сониясига 30 кадр тезликда 2К форматида видео ёзиб олиш имкониятига эга. У овоз билан ишга тушади. Яна бир жуфт динамика ва 40 км/соат тезликда шамолни бостириш функциясига эга олтита микрофон мавжуд.
Xiaomi AI Glasses’ни “янги авлод шахсий ақлли гаджети” сифатида тақдим этади. Компаниянинг ҳаммуассиси ва бош директори Лей Сзюннинг таъкидлашича, кўзойнаклар биринчи шахс номидан видео ёзиб олиши ва овозли буйруқларни бажариши мумкин — бу функциялар аллақачон бундай қурилмалар учун стандартга айланган.
Ички AI имкониятлари орасида: реал вақт режимида объектларни аниқлаш ва овозли ёрдамчи билан мулоқот қилиш ҳам мавжуд. Масалан, қурилма ўсимлик турини аниқлаши, таомдаги калорияни ҳисоблаши ёки капибаралар нима билан озиқланишини тушунтириши мумкин. Яна бир функция симсиз қулоқчинлардан фойдаланмасдан қўнғироқ қилиш, мусиқа тинглаш ва билдиришномалар олиш имкониятини ўз ичига олади.
Xiaomi AI кўзойнаклари уч хил рангда, жумладан, ярим шаффоф гардишда мавжуд бўлиб, бошланғич нархи 280 долларни ташкил этади. Улар аллақачон Хитойда сотувга чиқарилган.
Изоҳ (0)