Ибрагимовдан Жалоловгача. Ўзбекистоннинг Олимпиадалардаги байроқдорлари кимлар бўлган?

Токиода бўлиб ўтаётган Олимпиадада боксчи Баҳодир Жалолов ва таэквондочи Нигора Турсунқулова байроқдор сифатида Ўзбекистон делегациясини бошлаб чиқди. Аслида гимнастикачи Оксана Чусовитина ва боксчи Бобоусмон Ботуров Ўзбекистоннинг Токио—2020 даги байроқдори бўлиши белгиланган, бироқ Олимпиадага бир кун қолганда байроқдорлар ўзгарганди. Қуйида бундан аввалги Олимпиадаларда кимлар Ўзбекистон терма жамоаси байроқдори бўлгани ҳақида ҳикоя қилинади.

Атланта — 1996, Темур Ибрагимов 

1996 йил АҚШнинг Атланта шаҳрида бўлиб ўтган ёзги Олимпиадада Ўзбекистон делегациясини Темур Ибрагимов бошлаб чиққанди. Боксчи Темур Ибрагимов 1/16 финалда хорватиялик Стипе Дрвишга имкониятни бой бериб, Олимпиадани эрта ва медалсиз якунлаганди.

Сидней—2000, Муҳаммадқодир Абдуллаев

Сиднейдаги Олимпиада байроқдори Муҳаммадқодир Абдуллаев бўлган. Енгил ўрта вазн тоифасидаги финал жангида Муҳаммадқодир ақшлик рақиби Рикардо Уильямс устидан ғалаба қозониб, Ўзбекистон учун ёзги Олимпиадалар тарихидаги биринчи олтин медални тақдим этганди.

Афина—2004, Абдулла Тангриев

Грецияда бўлиб ўтган Олимпиадада Абдулла Тангриев делегацияни бошлаб чиққан эди. Афина шаҳри мезбонлик қилган Олимпиадада ўзбекистонлик дзюдочи оғир вазн тоифасида татамига чиқиб, нимчорак финалда эстониялик Индрек Пертелсонга мағлуб бўлган ҳолда мусобақани тарк этганди.

Пекин—2008, Дилшод Маҳмудов

Боксчи Дилшод Маҳмудов Хитойдаги Олимпиадада ўзбекистонликларни стадионга бошлаб чиққан эди. Пекин Олимпиадасида ўзбекистонлик боскчи -69 кг вазн тоифаси нимчорак финал жангида қозоғизстонлик Бакит Сарсекбаевга имкониятни бой берган эди.

Лондон—2012, Элшод Расулов

ХХХ ёзги Олимпиада ўйинларида Элшод Расулов Ўзбекистон байроқдори бўлганди. Боксчи чорак финалда россиялик Егор Мехонцевга енгилиб, медал қўлга киритиш имкониятидан маҳрум бўлганди.

Рио—2016, Баҳодир Жалолов

Боксчи Баҳодир Жалолов Жанубий Америкада илк бор ўтказилган Олимпиадада Ўзбекистон байроқдори сифатида делегацияни бошлаб чиққан. Тўртта олтин, иккита кумуш ва еттита бронза медални қўлга киритган спортчилар учун Риодаги Олимпиада Ўзбекистон тарихидаги энг сермаҳсул Олимпиада бўлган. Баҳодир чорак финал жангида Буюк британиялик Жо Жойсга енгилган эди. Якунда Жойс мусобақанинг кумуш медалини қўлга киритган.

Токио—2020, Баҳодир Жалолов

Баҳодир Жалолов иккинчи бор Олимпиадада Ўзбекистон терма жамоасини бошлаб чиқди, унга бу йўлда таэквондочи Нигора Турсунқулова ҳамроҳлик қилди.

Токио—2020 Олимпия ўйинлари очилиш маросими — суратларда