Бортида 530 киши бўлган Lufthansa авиакомпаниясига тегишли дунёдаги энг йирик йўловчи самолёти бўлган Airbus A380 нинг портлаш хавфи туфайли Нью-Йорк аэропортида шошилинч қўнгани ҳақида хабар берилганди. Ўзбекистонлик 7 карра Олимпиада иштирокчиси Оксана Чусовитина ҳам мазкур самолёт бортида бўлган. Бу ҳақда 41 ёшли спортчи «ТАСС»га маълум қилди.
Оксана Чусовитина унинг мураббийи Светлана Богинская ишлайдиган АҚШнинг Хюстон шаҳридан Германиянинг Франкфурт-Майн шаҳрига йўл олаётган эди.
«Парвоз вақтида бомба ҳақида хабар келиб тушди. Биз Нью-Йорк устидан учиб бўлгандик ва бирданига ортга қайтиб, деярли 10 дақиқа ичида қўндик. Самолёт кўздан кечирилиб, парвоз давом этади деб ўйлагандик. Аммо бизни эвакуация қилишди ва рейс бекор қилинди», – деди Чусовитина.
«Эртага эрталаб учишимизни ваъда қилишмоқда», – дея қўшимча қилди ўзбекистонлик гимнастикачи.
Қайд этиш жоиз, Оксана Чусовитина Хюстонда бўлиб турган вақтида кетма-кет 7 Олимпиадада иштирок этган гимнастикачи аёл сифатида Гиннеснинг рекордлари китобига киритилгани ҳақидаги сертификатни қабул қилиб олганди.
Оксана Чусовитина Олимпиадалардаги иштирокини Барселона–1992 дан бошлаган. 41 ёшли спортчи учун Рио–2016 ўйинлари еттинчи Олимпиада бўлди. Бундай кўрсаткичга дунё спорт гимнастикачилари орасида ҳали ҳеч ким эриша олмаган.
Маълумот учун, Чусовитина 1992 йили Барселонада ўтказилган Олимпиадада олтин медални, 2008 йилда Пекинда ўтказилган ўйинларда кумуш медални қўлга киритган эди.
Бундан ташқари, ўзбекистонлик гимнастикачи уч карра жаҳон чемпиони, жаҳон чемпионатларининг тўрт карра кумуш ва тўрт карра бронза медали соҳибаси саналади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)