Токио—2020 Олимпиадасининг очилиш маросими 23 июль, жума куни бўлиб ўтади.
Ўзбекистон делегациясининг байроқдорлари таэквондочи Нигора Турсунқулова ва боксчи Баҳодир Жалолов бўлади. Бу ҳақда Миллий Олимпия қўмитаси (МОҚ) бош котиби Ойбек Қосимов маълум қилди.
Аввалроқ МОҚ Токиодаги Олимпия ўйинларида Ўзбекистоннинг байроқдорлари гимнастикачи Оксана Чусовитина ва боксчи Бобоусмон Ботуров бўлиши ҳақида маълум қилганди. Бироқ очилиш маросимига бир кун қолганда байроқдорлар ўзгарган.
Ойбек Қосимов буни қуйидагича изоҳлади: «ХОҚ тавсиясига кўра, ҳар бир давлатдан бир аёл ва бир эркак номдор спортчи байроқдор бўлади. Ўзбекистон байроқдорларини танлашда авваламбор ҳар бир спорт тури бўйича мусобақалар жадвали, қолаверса барча делегатлар ва спортчиларнинг фикрини инобатга олган ҳолда, бу вазифа боксчи Баҳодир Жалолов ва таэквондочи Нигора Турсунқуловага ишониб топширилди».
Олимпия ўйинлари 8 августга қадар давом этади. Ўзбекистон делегацияси 17 та спорт тури бўйича 65 та йўлланмага эга бўлган. Ўзбекистонлик спортчилар 24 июлдан ўз иштирокини бошлайди.
Эслатиб ўтамиз, Баҳодир Жалолов Рио—2016 Олимпиадасида ҳам Ўзбекистон байроқдори бўлганди.
Изоҳ (0)