Спорт гимнастикаси бўйича Ўзбекистон шарафини ҳимоя қилувчи Оксана Чусовитина Глазгода ўтган 2015 йилги жаҳон чемпионатидаги иштирокидан қониқиш ҳосил қилди. «ТАСС» хабарига кўра, Чусовитина мазкур мусобақада ўз орзуси — фаолиятидаги еттинчи Олимпия ўйинларида қатнашиш учун муҳим қадам ташлади.
Чусовитина Глазгодаги мусобақа саралаш босқичида кўпкурашда 52-ўринни эгаллади ва финал босқичига чиқа олмади. Ўзбекистонлик спортчининг энг кучли жиҳати ҳисобланган таяниб сакраш мусобақаларида ҳам Чусовитина 30-ўринни эгаллаб, финал йўлланмасидан маҳрум бўлди.
«Мусобақада ёмон иштирок этмадим, деб ҳисоблайман. Муҳими, Олимпиада арафасидаги ҳафталикда қатнашиш ҳуқуқини қўлга киритдим ва ўз орзуим — фаолиятимдаги еттинчи Олимпиадада иштирок этишга яқин келдим. Глазгода фақат кўпкураш бўйича олимпия йўлланмалари ўйналди. Мен кўпдан бери барча тўрт снарядда қатнашаётганим йўқ, шу сабабли ҳам қандайдир жиддий совринга даъвогарлик қилишим мумкин эмасди», — деди Чусовитина.
Олимпиада арафасидаги ҳафталик 16—24 апрель кунлари Рио-де-Жанейрода бўлиб ўтади. Унда Олимпиада—2016 да қатнашиш ҳуқуқини қўлга киритган тўрттадан эркаклар ва аёллар жамоалари номи маълум бўлади. Шунингдек, яккалик баҳсларида қатнашадиган спортчилар орасида ҳам қўшимча саралаш ўтказилади.
40 ёшли Чусовитина олтита Олимпиадада қатнашган тарихдаги ягона гимнастикачидир. Чусовитина 1992 йили Бирлашган (собиқ СССР мамлакатлари спортчиларидан тузилган) жамоа таркибида Барселона олимпиадасида олтин, 2008 йили эса Германия терма жамоаси таркибида кумуш медалларни қўлга киритган, қолган йилларда у Ўзбекистон шарафини ҳимоя қилган. У уч карра жаҳон чемпиони ҳам ҳисобланади.
Изоҳ (0)