1992 йилги терма жамоа таркибида Олимпия чемпиони ва 2008 йилги ўйинларининг кумуш медали совриндори Оксана Чусовитина 2028 йилги Олимпиадада қатнашиш истагини билдирди. Бу ҳақда у ижтимоий тармоқдаги обуначилар саволларига жавоб бериш давомида маълум қилди.
Аввалроқ ўзбекистонлик гимнастикачи жароҳат олгани сабаб 2024 йилги Олимпиада ўйинларига саралаш баҳси бўлган Осиё чемпионатида иштирок эта олмагани маълум бўлган эди. Бироқ спортчининг сўзларига кўра, у ҳали ҳам Париж Олимпиадасида иштирок этиш умидини йўқотмаган.
Францияга бориш имконияти борми, деган саволга Чусовитина шундай жавоб берди: “Имкониятлар бор! Агар йўқ бўлса, 2028 йилда мени кўрасиз!”
Чусовитина 19 июнда 49 ёшга тўлади. Лос-Анжелесдаги навбатдаги ёзги Олимпиада ўйинлари бошланишида у 53 ёшга тўлади.
Навбатдаги Олимпиада Ўзбекистон қаҳрамони учун 9-мусобақа бўлади.
Оксана Чусовитина фаолиятига оид статистика ва фактлар
- МДҲ терма жамоаси сафида 1992 йилги Олимпиада чемпиони.
- 2008 йилги Олимпия ўйинлари вице-чемпиони.
- Уч карра Жаҳон чемпиони (1991 йилда жамоавий баҳслар (СССР терма жамоаси) ва эркин машқ, 2003 йилда таяниб сакраш).
- Жаҳон чемпионатларида тўрт карра кумуш (1991, 2001, 2005 ва 2011 йиллар) ва 4 карра бронза медали (1992, 1993, 2002, 2006) соҳиби.
- Таяниб сакраш бўйича Европа чемпиони (2008 йил), кумуш медал (2002) ва уч карра бронза эгаси.
- Таяниб сакраш бўйича Жаҳон Кубоги олтин медал соҳиби (2022 йил)
- Саккизта Олимпиадада қатнашган ягона гимнастикачи. Спортчи ушбу натижаси эвазига Гиннеснинг рекордлар китобига киритилган.
Изоҳ (0)