Каталониянинг “Барселона” клуби футболчиси Ламин Ямал Мадриднинг “Реал” жамоаси сафида ҳеч қачон ўйнамаслигини маълум қилди.
Футболчи Миллатлар Лигаси ярим финал доирасидаги Францияга қарши баҳс олдидан ўтказилган матбуот анжуманида журналистларнинг саволларига жавоб берди.
“Реал” сафида ўйнаш? Йўқ. Бу мутлақо мумкин эмас, дея қисқа жавоб берди 17 ёшли футболчи.
2024/25 йилги мавсум Ямал учун анча омадли ўтди. У барча мусобақалар доирасидаги 55 та учрашувда майдонга тушиб, ўз ҳисобига 18 та гол ва 25 та голли узатма ёздириб қўйган. Футболчи яқинда “Барселона” билан 2031 йилга қадар амал қиладиган шартнома имзолашини маълум қилди. Маълумотларга кўра, унинг товон пули 1 миллиард еврони ташкил қилади.
Эслатиб ўтамиз, “Барселона” ушбу мавсум учта совринга эга чиқди — клуб Испания чемпионати, Испания Кубоги ҳамда Суперкубогини қўлга киритди. Бундан ташқари, каталонияликлар 2024/25 йилги мавсумда “Реал Мадрид”га қарши ўтказилган тўртта “Эл-Класико”да ҳам ғалаба қозонди.
Изоҳ (0)