Клопп—Гвардиола қарама-қаршилиги бошланди, «Тоттенҳэм» чемпионликка даъвогар, «Челси»да эса ишлар жойида эмас. АПЛ 1-тури тафсилотлари

Футбол мухлислари орзиқиб кутган Англия Премьер лигасининг янги мавсумига ҳам старт берилди. 1-тур қизиқарли тўқнашувлар ва кўплаб голларни тақдим этди. «Дарё» тур тафсилотларини эътиборингизга ҳавола этади.

«Ливерпуль»—«Норвич»

Турни ўтган мавсум 99 очко билан чемпионликдан бебаҳра қолган Юрген Клопп бошчилигидаги «Ливерпуль» ўз майдонида «Норвич»ни қабул қилган ҳолда бошлаб берди.3 йиллик танаффусдан сўнг Премьер лигага қайтган «канарейкалар»нинг биринчи юриши эса омадли чиқмади. Учрашувнинг 7-дақиқасида Дивок Оригининг қанотдан узатган тўпини «Норвич» сардори Грант Ҳенли ўз дарвозасига йўллаб, «қизиллар»нинг ҳисобда олдинга чиқиб олишини таъминлади. Орадан 12 дақиқа ўтиб, ўтган йилги «Олтин бутса» соҳибларидан бири мисрлик Муҳаммад Салоҳ ҳам ўз номини таблога ёздириб қўйишга эришди. Клопп шогирдлари бўлим охирига қадар Виржил ван Дейк ҳамда Дивок Оригиларнинг биттадан киритган голлари эвазига ҳисобни йирик 4:0 кўринишига олиб келди. «Норвич» эса бу голларга иккинчи бўлимда фақатгина бир марта Пуккининг голи билан жавоб қайтарди.

Шу тариқа «Ливерпуль» янги мавсумда ҳам мақсади жиддий эканлигини кўрсатди. Бироқ бу ғалаба «қизиллар»га унчалик татимагани ҳам рост. Боиси, жамоанинг асосий посбони Алиссон жароҳат олиб, 6 ҳафтага сафдан чиқди.

«Вест Ҳэм»—«Манчестер Сити»

Янги мавсумда ҳам чемпионликка асосий даъвогар сифатида қаралаётган «Манчестер Сити» Лондонда «Вест Ҳэм» меҳмони бўлиб, йирик ҳисобдаги ғалабани тантана қилди. Учрашувнинг 25-дақиқасида ҳисобни Габриэль Жезус очди. Гвардиола шогирдларини иккинчи бўлимда тўхтатиб қолишнинг умуман иложиси бўлмади. Раҳим Стерлинг ҳет-трикка эришган бўлса, захирадан ўйинга қўшилган Серхио Агуэро ҳам ўз номига битта гол ёздириб қўйди. Қайд этиш жоиз, шу куни Мануэл Пеллегрини жамоаси сафида ёзги трансферлар вақтида сотиб олинган Пабло Форналс, Себастиан Аллер Премьер лигадагини дебютини ўтказган бўлса, «Сити» сафида бундай имкониятга деярли 80 миллион еврога харид қилинган Родри Эрнандес эга бўлди.

Учрашувдаги қизиқарли ҳолатлардан бири 86-дақиқада юз берди. Мезбонлар дарвозасига белгиланган пенальтини Серхио Агуэро амалга оширди. Зарбани эса Лукас Фабиански қайтаришга эришди. Аммо учрашув ҳаками Майкл Дин VAR орқали пенальтини қайта тепилиши кераклигини кўрсатди. Боиси,пенальти тепилаётган вазиятда Фабианскининг иккала оёғи ҳам дарвоза чизиғидан илгарилаб кетганди. Серхио эса иккинчи уринишдан унумли фойдаланди.

«Тоттенҳэм»—«Астон Вилла»

Мавсум бошланишидан олдин «Тоттенҳэм» бу йил кучли тўртликка кириш учун эмас, балки чемпионлик учун курашишини таъкидлаган Маурисио Поччетино жамоаси Премьер лигага қайтган «Астон Вилла»ни мағлуб этишда қийналгани рост. Боиси, ўйинда ҳисобни 9-дақиқадаёқ очган «Вилла» бутун беллашув давомида ҳимояда ўта зич ўйин кўрсатди. Гол уришнинг ҳадеганда имкони бўлавермагач, Почеттино 64-дақиқада Кристиан Эриксенни ўйинга ташлади. 73-дақиқага келиб эса «шпорлар»нинг тарихдаги энг қимматбаҳо трансферига айланган Тангуй Ндомбеле узоқ давом этган ҳужумни чиройли зарбаси билан якунлади. Шундан сўнг катта саҳнага жамоа тўпурари Ҳарри Кейн чиқди. Англия терма жамоаси сардори 4 дақиқа ичида иккита гол уриб, «Тоттенҳэм»нинг ишончли ғалабасини таъминлади.

«Ньюкасл»—«Арсенал»

Ёзги трансферлар вақтида янги футболчиларни сотиб олишга атиги 45 миллион фунти бор дея жар солинган, оқибатда таркибини 72 миллион фунтлик ўйинчи билан тўлдириб олган «Арсенал» мусобақанинг илк турида «Ньюкасл» меҳмони бўлиб, ғалаба билан ортга қайтди. Ўйиндаги ягона голни эса Мэйтленд-Найлзнинг ажойиб узатмасидан сўнг ўтган йилги «Олтин бутса»нинг уч соҳибидан бири бўлган Пьер-Эмерик Обамеянг словакиялик Мартин Дубравка қўриқлаётган дарвозага совуққонлик билан жойлаб қўйди. Шу куни Лондон клуби сафида Габриэль Мартинелли, Дани Себальос, Николя Пепелар Премьер лигадаги дебют учрашувини ўтказди.

«Манчестер Юнайтед»—«Челси»

Турнинг сўнгги ва сўзсиз марказий учрашуви Манчестердаги «Олд Траффорд» стадионида кечди. Унда Оле-Гуннар Сульшер қўл остидаги «Манчестер Юнайтед» Фрэнк Лэмпард қўл остига ўтган «Челси» билан беллашди. Учрашувдаги дастлабки гол Маркус Рэшфорд томонидан киритилди. Рэшфорд ўзига нисбатан Курт Зума тарафидан ишлатилган қўполлик учун белгиланган пенальтини аниқ амалга оширди. Биринчи бўлимда «Челси» анча фаоллик кўрсатиб, ҳисобни тенглаштиришга ҳаракат қилган бўлса-да, бунинг уддасидан чиқа олмади. Иккинчи бўлим эса тўлиқлигича «қизил иблислар»га аталди. Аввалига Андреас Перрейранинг узатмасини янги мавсумда яна 9-рақам эгасига айланган Антони Марсьяль Кепа дарвозасига жойлаб қўйган бўлса, орадан 2 дақиқа ўтиб Маркус Рэшфорд клубдан кетиши мумкинлиги овоза қилинаётган Пол Погбанинг майдон марказидан узоқроқ ҳудуддан узатган заргарона пасидан сўнг ҳисобни 3:0 кўринишига келтирди. Учрашувдаги сўнгги гол ҳам Пол Погбанинг қойилмақом юришидан сўнг киритилди. Ёзги трансферлар вақтида харид қилинган Дэниэл Жеймс захирадан майдонга тушиб, Премьер лигадаги дебют ўйинини гол билан нишонлади.

Шу тариқа Англия Премьер лигасининг 1-тури ўз ниҳоясига етди. Кейинги тур тафсилотлари орқали ғойибдан кўришгунча деб қоламиз, азиз мухлис.