Евро—2020 бошланишидан аввал мусобақанинг тўпурари ким бўлиши ҳақида муҳокамалар бўлиб ўтганди. Негадир Чиро Иммобиленинг исми деярли тилга олинмади.
Чиро «Стадио Олимпико» стадионидан узоқ бўлмаган жойда истиқомат қилади ва «Лацио» шарафини ҳимоя қилади. 2019/20 йилги мавсумда 36 та гол уриб, «Олтин бутса»ни қўлга киритган эди. Ўша вақтда у бир мавсумдаги голлари сони бўйича А Серия рекордини такрорлаганди (Жино Росетти 1928/29 йилги мавсумда, Гонсало Игуаин 2015/16 йилги мавсумда 36 та гол урган).
Ўтган мавсумда эса бу натижани такрорлай олмади. Шундай бўлса ҳам рақиблар дарвозасига 20 та гол уришга муваффақ бўлди. Унинг А Сериядаги статистикаси: 260 ўйинда 155 та гол. Ёмон эмас.
31 ёшли ҳужумчининг Евро—2020 дастлабки икки турида Туркия ва Швейцария дарвозасини ишғол қилиши ҳайратланарли эмас.
Ҳозирда унинг натижаларини танқид қилиш ҳам ғалати бўларди, лекин яширмаслик керак, Chironинг терма жамоадаги ишлари доим ҳам кўнгилдагидек кечмайди. 2017 йил ЖЧ—2018 йўлида Швецияга қарши плей-офф ўйинида Италия бирорта гол ура олмаган, Иммобиле ўша баҳсда ҳужум чизиғида ўйнаганди. Шу тариқа терма жамоа 1958 йилдан кейин илк марта Жаҳон Чемпионатига чиқа олмаган эди. Аслида бу Чиро учун икки йил давом этадиган голсиз сериянинг бошланиши эди. «Гол ура олмасангиз, юрагингиздаги оғриқ кучайиб бораверади», — тан олади Чиро 2019 йил сентябрь ойида Финляндия дарвозасини ишғол қилганидан сўнг. «Тўғрисини айтганда, бошқаларнинг муаммони бўрттириб кўрсатишга бўлган уринишлари менга оғир ботди», — деганди Иммобиле.
Роберто Манчини Италия терма жамоаси мураббийига айланганидан сўнг унинг олдида қизиқ бир дилемма пайдо бўлди: дунёнинг энг яхши тўпурар футболчиларидан бирини термага чақириши мумкин, лекин ўша ҳужумчининг терма жамоа учун фойдаси жуда кам тегган. Арзирмикан?
Дастлаб Манчини танқидчиларнинг овозини ўчириш учун Марио Балотеллига «юзинчи» имкониятни берди. Кейин эса тезкор Кевин Лазане ва иккинчи қават қироли Леонардо Паволетти ўз имкониятига эга бўлди. Ҳамманинг ёдидан чиқиб кетган ноёб истеъдод соҳиби Петро Пеллегри ҳам терма жамоадан чақирув олди. Қанчадир муддат Мойзе Кин ва Фабио Куальярелла жуфтлиги ишончли ҳаракат қилди.
Италия ҳужумчисиз ўйнаган вақтларда Иммобиле хурсанд бўлмагани аниқ. Масалан, Украинага қарши ўйинда (2018 йилда бўлиб ўтган ўртоқлик учрашуви) Федерико Бернардески «ёлғончи тўққизлик» вазифасини бажарди. Манчини Чирога бўлган ишончини йўқотгандек туюлганди, аслида эса ундай эмас. У клуб даражасида жуда яхши ҳаракат қиларди. Аммо мураббийнинг шубҳалари чекинмаганди, у ҳужумчининг ўзига бўлган ишончсизлиги ортда қолишини кутарди. Саралаш босқичида италиялик мутахассис «Пескара»дан бўлган даволаб бўлмас кашанда Зденек Земан тарбиялаган Инсинье, Вератти ва Иммобиле учлигидан фойдаланишга қарор қилди. Футболчилар бир-бирини жуда яхши тушунарди ва ҳужумни яхши кўрарди, шунинг учун Манчини уларга имкон бераётганидан хурсанд эди.
Барчаси кўнгилдагидек бўлмади, лекин Манчинининг мураббийлик услуби Чирога ажойиб таъсир ўтказди. Миллатлар Лигасида Нидерландия дарвозасини ишғол қила олмаган Иммобилега Манчини: «Польшага гол урасан», — деган эди.
Бу орада Стефано Сенси, Николо Барелла ва Лоренцо Пеллегрини каби ярим ҳимоячилар гол урарди. Кўпчиликда Италияга ҳужумчи керакмикан, деган савол пайдо бўлди, лекин Манчини дарров танқидчиларнинг оғзини ёпди: «У қачон майдонга чиқса, бизни хурсанд қилган». У ҳужумчининг «Лацио»даги 20 та голини таъкидларди.
«Биз доим ҳам кўриша олмаймиз, бу эса барчасини мураккаблаштиради. Агар 38 та ўйин кетма-кет ўтказганимизда, Чиро Италия учун 25 та гол урарди».Вақт ўтиши билан Италия унга мос услубни танлади. Иммобиле Евро—2020 нинг очилиш ўйинида Италия сафидаги 14-голини урди. Бу унинг йирик мусобақалардаги дастлабки гол эди (ЖЧ—2014 ва Евро—2016 да асосий футболчи эмасди). Аммо ҳозирги жамоада уни қадрлашларини ва унга ишонишларини ҳис қилади, демак голлар ҳам етарлича бўлади. Италия терма жамоаси уй ўйинларини «Лацио» стадионида ўтказиши шунчаки тасодиф эмас.
Италияда ҳужум чизиғи билан боғлиқ муаммо бартараф этилди. Чиро Иммобиле ҳар бир ўйинда гол уришга тайёр.
Италия терма жамоаси Евро—2020 нинг А гуруҳида 9 очко тўплаб, биринчи ўрин билан плей-офф босқичига йўл олди. Нимчорак финалда «Скуадра Адзурра» Австрияни 2:1 ҳисобида таслим этди. Чорак финалда эса Бельгияни ҳам худди шундай ҳисобда мағлубиятга учратди ва ярим финалга йўл олди. Чиро Иммобиле ҳисобида ҳозирча 2 та гол мавжуд.
6 июль, сешанба тунида Евро—2020 мусобақасининг ярим финал ўйини бўлиб ўтади. Италия «Уэмбли» стадионида Испанияга қарши баҳс олиб боради. Учрашув Тошкент вақти билан 00:00 да старт олади.
Изоҳ (0)