Ўзбекистондаги айрим оилавий поликлиникаларда тиббиёт ходимлари 1 июлдан фақат тўлиқ ставкада ишлайди. Бу ҳақда президентнинг 19 майдаги фармонида белгиланди.
Фармонга кўра, 2025 йил 1 июлдан қуйидаги ҳудудларда тажриба-синов тариқасида соғлиқни сақлаш тизимини ташкил этишнинг янги модели (тажриба-синов лойиҳаси) жорий қилинади:
- Қорақалпоғистон Республикаси Чимбой тумани;
- Андижон вилояти Асака тумани;
- Бухоро вилояти Ғиждувон тумани;
- Жиззах вилояти Ғаллаорол тумани;
- Қашқадарё вилояти Китоб тумани;
- Навоий вилояти Хатирчи тумани;
- Наманган вилояти Чортоқ тумани;
- Самарқанд вилояти Самарқанд шаҳри ҳамда Булунғур ва Иштихон туманлари;
- Сурхондарё вилояти Денов тумани;
- Сирдарё вилояти Сирдарё тумани;
- Тошкент вилояти Янгийўл шаҳри;
- Фарғона вилояти Қува тумани;
- Хоразм вилояти Шовот тумани.
2026 йил 1 январдан эса Самарқанд вилоятининг барча туман (шаҳар)ларида ушбу тажриба-синов лойиҳаси жорий қилинади.
Тажриба-синов лойиҳаси доирасида:
- оилавий поликлиникаларда тиббиёт ходимлари фақат тўлиқ ставкада фаолият юритади;
- аҳолига оилавий шифокорни эркин танлаш ҳуқуқи берилади.
- туман (шаҳар) тиббиёт бирлашмалари негизида туман (шаҳар) соғлиқни сақлаш бўлимлари ташкил этилади;
- оилавий поликлиникаларда аҳолига тиббий ёрдам кўрсатувчи оилавий шифокор, педиатр, акушер-гинеколог ва ташхислаш хизматларини кўрсатувчи мутахассислар, шунингдек, аутсорсинг асосида стоматология хизмати йўлга қўйилади;
- оилавий поликлиникадан 10 километрдан узоқ масофада жойлашган маҳалла фуқаролар йиғинларида яшовчи аҳоли учун тиббиёт ходимларининг сайёр тиббий хизмати йўлга қўйилади.
Шунингдек, аҳолига тиббий хизматлар давлат бюджети маблағлари ҳисобидан қопланадиган тиббий ёрдамнинг кафолатланган ҳажмлари доирасида оилавий шифокор ёки тиббиёт бригадасининг йўлланмаси асосида бепул кўрсатилади (шошилинч ва тез тиббий ёрдам кўрсатиш бундан мустасно).
Кафолатланган пакетга киритилмаган қўшимча тиббий ёрдам ҳамда оилавий шифокор ёки тиббиёт бригадаси йўлланмаси мавжуд бўлмасдан тўғридан-тўғри мурожаат қилинган фуқароларга тиббий ёрдам пуллик асосда кўрсатилади.
Шавкат Мирзиёев раислигида 7 май куни ўтказилган видеоселектор йиғилишида тиббий ёрдамнинг кафолатланган пакети тасдиқланиб, пакет доирасида тиббий хизмат ва дори воситалари тўлиқ бюджетдан қопланиши, шунингдек, бундан буён бирламчи бўғинда ярим ёки 0,25 ставка бўлмаслиги, барча шифокор ва ҳамширалар фақат тўлиқ ставкада ишлаши қайд этиб ўтилганди.
Изоҳ (0)