Билл Гейтс ҳар доимгидек ёзги китоблар рўйхатини эълон қилди — бу сафар рўйхатга уни таъсирлантирган мемуарлар киритилган. Бешта китобнинг барчасида қийинчиликларни енгиш, етакчилик ва адолатга интилиш тасвирланган.
Кетрин Гремнинг “Шахсий ҳикоя” (Personal History) китоби The Washington Post газетасининг афсонавий ношири ҳақидаги самимий хотиралардир. У эрининг ўз жонига қасд қилишидан сўнг газетани бошқаришни ўз зиммасига олган. Тажрибасизлиги ва ташқи босимга қарамай, у нашриётни энг катта инқирозлардан олиб ўтади. Гейтс бу китобни жасорат ва кучли характернинг ёрқин намунаси сифатида таърифлайди.
Николас Кристофнинг “Умид сари интилиб” (Chasing Hope) асари умрини қашшоқлик ва касалликларга қарши курашга бахшида этган Пулитцер мукофоти совриндори бўлган журналистнинг ҳаёт йўли ҳақида ҳикоя қилади. Унинг мақолалари, хусусан, болалар ўлими мавзусидаги ёзганлари Билл Гейтсни Gates Foundation хайрия жамғармасини ташкил этишга ундаган. Китобда Кристофнинг энг оғир вазиятларда ҳам умидни йўқотмаслигига алоҳида эътибор қаратилган.
Тара Вестовер “Таълим олган” (Educated) асарида жамиятдан ажралган ҳолда — мактабсиз, шифохоналарсиз ва ҳужжатларсиз ўтган болалигини тасвирлайди. Шундай бўлса-да, у университетга киришга муваффақ бўлади ва Кембрижда диссертациясини ҳимоя қилади. Гейтс унда ғайритабиий ирода ва ўз-ўзини ўқитишга бўлган кучли иштиёқнинг намунасини кўради.
Комик Тревор Ной “Рангсиз” (Born a Crime) номли автобиографиясида апартеид давридаги Жанубий Африкада ўтган болалик хотиралари ҳақида сўзлайди. Қонун томонидан тақиқланган никоҳдан туғилган Тревор камбағаллик, зўравонлик ва ирқчиликни ҳазил ва дард билан тасвирлайди. Гейтсни, айниқса, тил одамлар ўртасидаги ажралишни бартараф этиш воситаси сифатида кўрсатилгани ҳайратга солган.
“Таслим бўлиш” (Surrender) китобида эса Боно дублинлик ўсмирдан U2 гуруҳининг етакчиси ва ижтимоий адолат учун фаол курашчига айланган йўлини тасвирлайди. Боно билан шахсан таниш бўлишига қарамай, Гейтс китобдан кўп янги маълумотларни ўзлаштирди — отаси билан мураккаб муносабатлар тарихи ва гуруҳдаги ички келишмовчиликлар тафсилотларигача.
Изоҳ (0)